Elxan Şahinoğlu: Əgər İranın Ermənistana silah verməsi xəbəri təsdiq olunarsa,...

Politoloq: “Əgər İranın həqiqətən Ermənistana 500 milyon dəyərində silah-sursat, hərbi-texnika verdiyi təsdiqlənərsə, bu İran-Azərbaycan münasibətlərinə çox mənfi təsir edəcək”.

“Əgər İranın Ermənistana silah verməsi xəbəri təsdiq olunarsa, necə ki biz Fransa, Avropa İttifaqı və Ermənistana silah verən digər ölkələrə sərt mövqe bildiririksə, eyni sərt mövqeni də İrana bildirmək məcburiyyətində qalacağıq”.

Bu sözləri politoloq Elxan Şahinoğlu İranın Ermənistanla silah müqaviləsinin Azərbaycana təsirlərini Poliqon-a şərh edərkən qeyd edib.

Son məlumatlara görə, İslam Respublikası və Ermənistan 500 milyon dollar dəyərində böyük silah müqaviləsi imzalayıb. Bu müqaviləyə əsasən Tehran İrəvana kamikadze pilotsuz təyyarələr, “Xordad”, “Məcid” və “Arman” raketdən müdafiə sistemləri verəcək. Saziş həmçinin kəşfiyyat sahəsində əməkdaşlıq, sıx hərbi əlaqələr, təlim və Ermənistan ərazisində bazaların tikintisini əhatə edir.

Bu əslində həm İranın, həm də Erməsintanın qırmızı xətti keçməsi anlamına gəlirmi? Azərbyacanın bu sazişə reaksiyası necə olmalıdır və Azərbaycan artıq Ermənistana qabaqlayıcı zərbələr endirməlidir?

Mövzunu Poliqon-un əməkdaşı “Atlas” Araşdırmalar Mərkəzinin rəhbəri, politoloq Elxan Şahinoğlu ilə müzakirə edib.

Elxan Şahinoğlu: “Bu xəbər olmadan, əvvələr də şübhələrimiz var idi ki, əgər İran Rusiyaya pilotsuz uçuş aparatları verirsə, bu pilotsuz uçuş aparatlarını Ermənistana da gizli şəkildə verə bilər”.

Birinci növbədə Tehranın bu xəbərlərə aydınlıq gətirməli olduğunu vurğulayan politoloq Poliqon-a açıqlamasında qeyd edib ki, Tehran bu məsələ barədə açıqlama verməlidir:

“Əgər İranın həqiqətən Ermənistana 500 milyon dəyərində silah-sursat, hərbi-texnika verdiyi təsdiqlənərsə, bu İran-Azərbaycan münasibətlərinə çox mənfi təsir edəcək. Onsuz da, İran-Azərbaycan münasibətlərində suallar var.

Doğrudur, Pezeşkianın İranda prezident seçilməsindən sonra ümidlər var ki, Azərbaycan-İran münasibətlərində müsbət istiqamət qeydə alınacaq. Amma bu cür xəbərlər münasibətlərə zərər verə bilər. Buna görə də, birinci növbədə gərək Tehran bu xəbərlərə aydınlıq gətirsin. Tehran bu məsələ barədə açıqlama verməlidir.

Bu xəbər olmadan, əvvələr də şübhələrimiz var idi ki, əgər İran Rusiyaya pilotsuz uçuş aparatları verirsə, bu pilotsuz uçuş aparatlarını Ermənistana da gizli şəkildə verə bilər. Əgər İranın Ermənistana silah verməsi xəbəri təsdiq olunarsa, necə ki biz Fransa, Avropa İttifaqı və Ermənistana silah verən digər ölkələrə sərt mövqe bildiririksə, eyni sərt mövqeni də İrana bildirmək məcburiyyətində qalacağıq”.

Nərminə UMUDLU
Poliqon.info