Kriptovalyuta ilə hesablaşmaların hansı riskləri var?...
İqtisadçı-ekspert: “İstər Rusiya, istərsə də İran tərəfi dollardan asılılığın nisbətən azaldılması, sanksiyalara dayanıqlığa az da olsa, yardımın olması üçün müxtəlif üsullardan istifadə etməyə çalışırlar”.
“Kriptovalyuta hava ilə dolmuş şardır. Yəni hər zaman partlaya bilər”.
Bu sözləri iqtisadçı-ekspert Eldəniz Əmirov Rusiya və İranın hesablaşmalarda kriptovalyutadan istifadə etmək qərarını Poliqon-a şərh edərkən qeyd edib.
Son məlumatlara görə Rusiya və İran hesablaşmalarda kriptovalyutadan istifadə edəcəklər. Dünən isə Rusiyanın Tehrandakı səfiri Aleksey Dedov hazırda İran və Rusiyanın rəqəmsal valyutaların ixrac-idxal əməliyyatları üçün istifadə imkanlarını araşdırdığını bildirib.
Eyni zamanda səfir qanunvericilik bazasının yaradılmasının zəruriliyinə də vurğulayıb və qeyd edib ki, İxrac-idxal əməliyyatları üçün hesablaşmalarda rəqəmsal maliyyə aktivləri və valyutalarından istifadə məsələlərin beynəlxalq aləmdə hüquqi bazası yaradılmalıdır.
Bəs dövlətlərin öz ticarətlərində rəqəmsal valyutalardan istifadə etməsi nə qədər effektlidir və bu cür hesablaşmaların hansı riskləri var? Dövlətlər arasında iqtisadi əlaqələrdə rəqəmsal valyutalar yayğınlaşa bilər?
Mövzunu Poliqon-un əməkdaşı iqtisadçı-ekspert Eldəniz Əmirov ilə müzakirə edib.
Eldəniz Əmirov: “Rusiya və İranın hesablaşmalarda kriptovalyutadan istifadə etmələri uğursuz olacaq”.
Kriptovalyutada çox böyük risklərin olduğunu nəzərə çatdıran ekspert Poliqon-a açıqlamasında qeyd edib ki, İran və Rusiyanın kriptovalyutalara üz tutması onların başqa alternativlərinin olmasını göstərir:
“İstər Rusiya, istərsə də İran tərəfi dollardan asılılığın nisbətən azaldılması, sanksiyalara dayanıqlığa az da olsa, yardımın olması üçün müxtəlif üsullardan istifadə etməyə çalışırlar. Ya barter forması, ya biri digərinin milli valyutasından istifadə edərək öz aralarında ticarət hesablaşmaları aparılar. İndi Rusiya və İranın hesablaşmalarda kriptovalyutadan istifadə etmək qərarı bu addımlardan biridir.
Eyni zamanda nəzərə almalıyıq ki, kriptovalyuta hava ilə dolmuş şardır. Yəni hər zaman partlaya bilər. Buna görə də kriptovalyutada çox böyük risklər var. İran və Rusiyanın kriptovalyutalara üz tutması onların başqa alternativlərinin olmasını göstərir.
Həmçinin hər iki tərəfin ticarət əlaqələrində digərinin rolu böyük deyil. Buna görə də hansısa problem yarananda biri digərini xilas edə bilməyəcək. Hesab edirəm ki, Rusiya və İran hesablaşmalarda kriptovalyutadan istifadə etməkləri uğursuz olacaq. Çünki risklər çoxdur və kriptovalyutanın özünün spesifiki baxımından da risklər var. Həm də iki ölkə arasında etimad məsələsində də problemlərin olduğunu deyə bilərik”.
Nərminə UMUDLU
Poliqon.info