Rusiya maliyyə bazarında yuanın dolları əvəz etməsi mümkündür?

İqtisadçı-ekspert: “Rusiyada bu gün dolları yuanla əvəz edirik deyilirsə və yenə də dollar qalxırsa, deməli bu çağırış, bəyanat ciddi qəbul edilmir və bu əslində o deməkdi ki, dollara tələbat artır”.

“Birjada baş verənlər, əslində iqtisadiyyatın real mənzərəsidir. Yəni, Rusiya iqtisadiyyatında vəziyyət hakimiyyətin dediyi kimi deyil”.

Bu sözləri iqtisadçı-ekspert Eldəniz Əmirov yuanı dolların əvəz etməsi iddiasını Poliqon-a şərh edərkən qeyd edib.

Bu gün Moskva birjasında keçirilən ticarət zamanı Avropa valyutasının dəyəri 88 rubldan yuxarı qalxıb. Dollar isə 93 qəpik bahalaşaraq 80,77 rubl olub. Digər tərəfdən isə Rusiyada dollar və avroya olan tələbatın yuanla əvəz olunduğu barədə məlumatlar yayılır.

Yuan dolları əvəz edirsə, o zaman dollar və avro rubla qarşı hansı səbəbdən bahalaşır? Ümumiyyətlə, Rusiya maliyyə bazarında yuanın dolları əvəz etməsi hansı səviyyədə mümkündür?

Mövzunu Poliqon.info-un əməkdaşı Eldəniz Əmirov ilə müzakirə edib.

Eldəniz Əmirov: “Proses olaraq reallıq odur ki, bir ölkənin iqtisadi vəziyyəti nə qədər geri gedirsə, o ölkənin milli valyutası dəyər itirir”.

Manatın, rublun, dolların, avronun yaxud da yuanın real vəziyyətinin ölkənin iqtisadi vəziyyəti ilə əlaqəli olduğunu vurğulayan ekspert Poliqon-a açıqlamasında qeyd edib ki, əgər bu gün manat rubl qarşında Moskva birjasında güclənibsə, deməli həmin vaxt üçün Azərbaycan iqtisadiyyatının dinamikası Rusiya iqtisadiyyatının dinamikasından daha yaxşı qiymətləndirilib:

“Birjada baş verənlər, əslində iqtisadiyyatın real mənzərəsidir. Yəni, Rusiya iqtisadiyyatında vəziyyət hakimiyyətin dediyi kimi deyill. Yuan heç vaxt dolları əvəz edə bilməyəcək. Heç vaxt dedikdə yaxın müddətli dövrü nəzərdə tuturam. Bəlkə beş il sonra hansısa bir situasiya yaranacaq. Amma hazırkı vəziyyətdə bu tip məsələlər sözdə həll olunmur. Çünki ticarətin öz qanunları var. Dövriyyələrin də öz qanunları var. Buna görə də bu məsələlər bir az sadə formada həll olunmur.

Proses olaraq reallıq odur ki, bir ölkənin iqtisadi vəziyyəti nə qədər geri gedirsə, o ölkənin milli valyutası dəyər itirir. Yəni, o ölkə rəhbərinin hansı qərar verməsi, hansı çıxışlar etməsindən asılı deyil. Manatın, rublun, dolların, avronun yaxud da yuanın real vəziyyəti ölkənin iqtisadi vəziyyəti ilə əlaqəlidir. Əgər bu gün manat rubl qarşında Moskva birjasında güclənibsə, deməli həmin vaxt üçün Azərbaycan iqtisadiyyatının dinamikası Rusiya iqtisadiyyatının dinamikasından daha yaxşı qiymətləndirilib. Azərbaycan iqtisadiyyatı daha etibarlı hesab olunub.

Rusiyada bu gün dolları yuanla əvəz edirik deyilirsə və yenə də dollar qalxırsa, deməli bu çağırış, bəyanat ciddi qəbul edilmir və bu əslində o deməkdi ki, dollara tələbat artır. Bir daha qeyd edim ki, yaxın bir neçə il ərzində istər Rusiyada, istərsə də başqa ölkələrdə yuanın dolları əvəz etməsi mümkün deyil”.

Nərminə UMUDLU
Poliqon.info