Nobel mükafatı laureatı Banqladeşin baş naziri ola bilər

Nobel Sülh Mükafatı laureatı Məhəmməd Yunus baş nazir Şeyx Hasinanın istefasından sonra Banqladeşin müvəqqəti hökumətinin rəhbərlərindən biri ola bilər.

Poliqon xəbər verir ki, bu barədə “Times of India” qəzeti məlumat yayıb.

“Banqladeşdə son tələbə etirazlarının koordinatorları Nobel Sülh Mükafatı laureatı Məhəmməd Yunus baş nazir olmaqla yeni müvəqqəti hökumətin yaradılmasını təklif ediblər”, deyə nəşr yazır.

Qeyd olunur ki, Yunis 2006-cı ildə mikrokredit və mikromaliyyə sahəsində qabaqcıl fəaliyyətinə görə Nobel Sülh Mükafatını alıb.

Qəzet əlavə edib ki, Yunus 2009-cu ildə ABŞ Prezidentinin “Azadlıq” medalı və 2010-cu ildə Konqresin “Qızıl” medalı da daxil olmaqla, “çoxsaylı nüfuzlu mükafatlar” alıb.

Xatırladaq ki, avqustun 5-də etirazçılar Banqladeşin baş naziri Şeyx Hasinanın Dəkkədəki rəsmi iqamətgahına basqın ediblər. Hasina istefa verib və Hindistana qaçıb. Hindistanın “Hindu” qəzetinə görə, o, İngiltərədən sığınacaq istəyib.

Qeyd edək ki, Banqladeşdə iğtişaşlar 2024-cü ilin iyun ayında tələbələrin məşğulluq kvotası ilə bağlı etirazları fonunda başlayıb və bu günə qədər davam edir. Etirazçılarla qarşı ordu cəlb edilib.

Poliqon.info