Qırğızıstanın Əmək Nazirliyi ölkə vətəndaşlarına xəbərdarlıq edib ki, Rusiyada terror aktları törətmək üçün işə götürülmə cəhdlərinə uymasınlar...
Poliqon xəbər verir ki, bu barədə nazirliyin saytında məlumat verilib.
Əmək Nazirliyi qırğız xalqına xəbərdarlıq edib ki, populyar sosial şəbəkələr və Telegram kimi messencerlər vasitəsilə Rusiyada terror aktlarında iştirak etmək üçün vətəndaşların, o cümlədən uşaqların fəal cəlb edilməsi aparılır.
İdarədən bildirilib ki, təcavüzkarlar tanışlıq saytlarında insanların profillərini təhlil edir, müxtəlif qruplardakı şərhləri öyrənir, dini, mədəni, milli və digər sosial xüsusiyyətlərə görə qurbanları müəyyənləşdirir, əhalinin həssas təbəqələrinə üstünlük verirlər.
Əmək Nazirliyinin nümayəndəliyi Rusiyada yaşayan vətəndaşlarını təxribatlara uymamağa, sosial şəbəkələr vasitəsilə işə düzəlməməyə, müxtəlif tədbirlərdə iştirak etməməyə, övladlarına diqqət yetirməyə çağırıb.
Nazirlik həmçinin xatırladıb ki, terror aktında iştirak etmək Rusiya cinayət qanunvericiliyi ilə ömürlük həbsə qədər cəzalandırılır.
Martın 22-də axşam saatlarında Moskva yaxınlığındakı Krasnoqorskda "Crocus City Hall" konsert zalında terror aktı baş verib. "Piknik" qrupunun çıxışından əvvəl silahlı şəxslər zala soxularaq tamaşaçılara atəş açıblar. Bundan sonra partlayışlar baş verib və yanğın başlayıb.
Martın 23-də səhər saatlarında Bryansk vilayətində terror aktında şübhəli bilinən 4 nəfər saxlanılıb. Onlar Tacikistan vətəndaşlarıdır.
Poliqon.info