Dövlət Departamenti Dudanın NATO-da müdafiə xərclərini artırmaq təklifinə cavab verib...
ABŞ Dövlət Departamenti Polşa prezidenti Anjey Dudanın bir gün əvvəl NATO üzvü olan ölkələrə müdafiə xərclərinin minimum səviyyəsini ÜDM-in 2%-dən 3%-ə çatdırmağı təklif edəcəyini bildirən bəyanatını şərh edib.
Poliqon xəbər verir ki, bu barədə Dövlət Departamentinin sözçüsü Metyu Miller brifinq zamanı danışıb.
Millerin sözlərinə görə, ilk növbədə bütün NATO-ya üzv ölkələrin müdafiə üçün ÜDM-in 2%-i hədəfinə nail olmaq lazımdır. Dövlət Departamentinin sözçüsü qeyd edib ki, hazırda NATO ölkələrinin təxminən üçdə ikisi müdafiə xərclərini bu səviyyədə saxlayır.
“Lakin mən hesab edirəm ki, bu, əlavə təkliflərin müzakirəsinə başlamazdan əvvəl ilk addımdır”, deyə Dövlət Departamentinin rəsmisi əlavə edib.
Qeyd edək ki, Polşa prezidenti Anjey Duda bildirib ki, ABŞ-a səfəri zamanı o, NATO üzvü olan ölkələrə müdafiə xərclərinin minimum səviyyəsini ÜDM-in 2%-dən 3%-ə çatdırmağı təklif edəcək.
Xatırladaq ki, bu gün, martın 12-də Polşa prezidenti Anjey Duda və Baş nazir Donald Tusk ABŞ-a səfərə gedəcək.
Poliqon.info