G20 ölkələri Rusiyanın Ukraynadakı müharibəsi ilə bağlı ortaq yanaşma barədə razılığa gəliblər...
Poliqon xəbər verir ki, bu barədə Bloomberg Agentliyi yüksək rütbəli fransız rəsmiyə istinadən yazır.
Agentliyin məlumatına görə, razılaşma Çinin mövqeyini yumşaltması səbəbindən əldə edilib. Əvvəllər Çin Ukraynadakı hərbi münaqişə ilə bağlı neytrallıq siyasətini davam etdirirdi. G20 sammitinin yekun kommünikesinin hazırlanması üzrə danışıqlarda iştirak edən Bloomberg mənbəsinin məlumatına görə, indi çinli diplomatlar Ukrayna ilə bağlı “daha yumşaq mövqe” tutublar. Mənbə digər təfərrüatları açıqlamayıb.
Bloomberg qeyd edir ki, kommünike məsələsində daha sonra Rusiya ilə kompromis əldə edilməli olacaq. Bu arada Fransa rəsmisi bildirib ki, bu il sammitə ev sahibliyi edən Hindistan Rusiya qüvvələrinin Ukraynadakı hərəkətlərini pisləməkdən imtina etməyə davam edir.
2022-ci ildə İndoneziyada keçirilən G20 sammitindən sonra qəbul edilən kommünikedə qrup üzvlərinin əksəriyyəti müharibəni “qətiyyətlə pisləyib”. Eyni zamanda, sənəddə bu məsələ ilə bağlı “digər fikirlərin” mövcudluğu qeyd edilib. Rusiya bu cür aydınlaşdırmada israr edirdi. G20 nümayəndələrinin fevral, iyul və avqust aylarında keçirilən görüşlərində Ukrayna münaqişəsi ilə bağlı mövqelər fərqli olduğuna görə yekun bəyanatlar razılaşdırılmayıb.
Qeyd edək ki, G20 sammiti 2023-cü il sentyabrın 9-10-da Yeni Dehlidə keçiriləcək. Tədbirdə Rusiya prezidenti Vladimir Putin və Çin lideri Si Szinpin iştirak etməyəcək. Sammitdə Rusiyanı Rusiyanın xarici işlər naziri Sergey Lavrov, Çini isə Baş nazir Li Qian təmsil edəcək.
Poliqon.info