General Mark Milli: Ukraynada döyüşlər şiddətlənib...

“Ukraynada döyüşlər şiddətlənib, lakin əməliyyatlarla bağlı gündəlik hesabatlardan çox nəticə çıxarmağa dəyməz”.

Poliqon xəbər verir ki, bunu ABŞ Silahlı Qüvvələrinin Birləşmiş Qərargah Rəisləri Komitəsinin rəhbəri, general Mark Milli Associated Press Agentliyinə müsahibəsində deyib.

“Ukraynanın Rusiya tərəfindən işğal olunmuş ərazilərində aktivlik var və döyüşlər bir qədər intensivləşib”, deyə Milli bildirib.

General qeyd edib ki, əks-hücumun rəsmən başlandığını elan etmək Ukraynanın işidir, o, sadəcə olaraq Ukrayna Silahlı Qüvvələrinin bu əməliyyata hazır olduğunu deyə bilər: “Bizim hesablamalarımıza görə, Ukrayna hərbçiləri istənilən hərəkətlərə, həm hücuma, həm də müdafiəyə yaxşı hazırlaşıblar”, deyə Milli vurğulayıb.

Milli deyib ki, o, müttəfiqlərin qışda verdiyi təlim və silahların Ukraynanı gələcək hərbi əməliyyatlara hazırladığına inanır: “Çoxlu təlim keçilib, çoxlu təchizat olub, digər ölkələr, o cümlədən ABŞ çoxlu sursat verib”, deyə ABŞ Silahlı Qüvvələrinin Birləşmiş Qərargah Rəisləri Komitəsinin rəhbəri qeyd edib.

“Hər hansı bir böyük döyüş kimi, müharibə də uğur və uğursuzluqdan ibarətdir. Hücum və müdafiə xarakterli hərəkətlər olacaq, aktivliyin artdığı günlər və azaldığı günlər də olacaq. Ona görə də irəli və geriyə hərəkətlər normaldır”, deyə Milli bildirib.

Poliqon.info