Qarabağ separatçısı “seçki”lərə qarşı çıxdı - koronavirusa görə

Musavat.com erməni mediasına istinadən xəbər verir ki, “prezidentliyə namizəd” Masis Mailyan əhaliyə müraciət edərək onları “seçkilərin ikinci turu”nda iştirakdan imtinaya çağırıb. İlk tutu 31 martda keçirilən saxta “prezident seçkiləri”nin ikinci turu aprelin 14-ə təyin olunub. M.Mailyan da koronavirus pandemiyası ilə bağlı təhlükəni nəzərə alaraq “seçki”lərin təxirə salınmasını istəyib.

Hələ mart ayında M.Mailyan risklərdən yayınmaq üçün “seçkilərlə bağlı təkliflər irəli sürmüşdü. Digər separatçıların “təkrar seçkilər”lə bağlı mövqeyi hələlik bəlli deyil.

Qeyd edək ki, saxta “seçki”lərdə keçmiş “baş nazir” Araik Arutyunyan 49,26 faiz, “eks-xarici işlər naziri” Masis Mailyan 26,4 faiz səs toplayaraq “ikinci tur”a keçiblər. Maraqlısdır ki, “seçki” tamaşasından dərhal sonra hər iki separatçı özünü İrəvana çatdırıb və Nikol Paşinyanla görüşüblər. Baxmayaraq ki, bu günlərdə koronavirus səbəbindən Ermənistanla Dağlıq Qarabağ arasındakı yollar bağlanıb.

pia.az