Bədxərclik: UNEC Məzun Gününə 98 min manat xərcləyib

PİA.az xəbər verir ki, dərs ilinin sona çatması ilə məzun gecələri ilə gündəmə gələn Azərbaycan Universitetlərinin həm bədxərcliyi, həm də qeyri-şəffaf, rəqabət zəminini yox edən idarə üsulu diqqət mərkəzində olub.

Xüsusilə, “Məzun 2019” tədbirini möhtəşəm şou-proqrama çevirən Bakı Dövlət Universiteti və Azərbaycan Dövlət İqtisadiyyat Universiteti (UNEC) kifayət qədər bədxərclik ediblər. Hər iki universitet tədbirin keçirilməsini tenderlə həyata keçirməsə də, ADİU öz xərclərini açıqlayıb : 98.500 manat.

Azərbaycan təhsilinin indiki vəziyyətində bu qədər məbləğin məzun gecəsinə xərclənməsi, acınacaqlı olsa da, iqtisadçıların və sahibkarların azad rəqabət şəraiti yaradılmadığı üçün daha çox qınaq obyektinə çevrilib.

Hər iki müəssisə tədbiri “Bakı Kristal Zalı” MMC ilə bağladıqları müqavilə əsasında keçirsə də, fərqli yanaşmalar ortaya qoyub. BDU ümumən xərclərini və tenderi elan etməsə də, ADİU gözdən pərdə asmaq niyətilə ilin əvvəlindən baş tutması gözlənilən tədbirə cəmi 9 gün qala “kotirovka” elan edib. Elan isə simvolik mahiyyət daşıyıb, çünki elandan 9 gün öncə ADİU rəsmi səhifəsi tədbirin keçiriləcəyi məkan haqqında məlumatı öz məzunları ilə paylaşıb.

Gələcəyin iqtisadçılarını yetişdirən bir qurumun belə bir biabırçılığa imza atması isə ictimaiyyət tərəfindən birmənalı qarşılanmayıb. Bununla bağlı sosial şəbəklərdə ciddi müzakirələr olub və universitet rəhbərliyi qınaq obyekti olub.

pia.az