Məhərrəm İncə ikinci turda kimi dəstəkləyəcək?

Poliqon xəbər verir ki, bu barədə RİA Novosti Agentliyinə namizədin qərargahındakı mənbə məlumat verib.

“Hazırda Məhərrəm İncənin dəstəkləyəcəyi namizədlə bağlı qiymətləndirmə prosesi gedir”, deyə mənbə bildirib.

“Məmləkət” Partiyasının lideri Məhərrəm İncə seçkiyə üç gün qalmış namizədliyini geri götürdüyünü açıqlayıb. İlkin məlumatlara görə, Məhərrəm İncə 0,4%-dən çox səs toplayıb - xaricdəkilər də daxil olmaqla 234 mindən çox seçici ona səs verib. Türkiyə MSK daha əvvəl Məhərrəm İncənin seçkilərdə iştirakdan imtina etməsinə baxmayaraq, onun lehinə səslərin ləğv edilməyəcəyi barədə qərar vermişdi.

Məhərrəm İncə seçkilərdə iştirakdan imtina etdikdən sonra tərəfdarlarına qalan üç namizəddən bu və ya digərinə səs vermək üçün müraciət etməyib. Son sorğulara görə, seçicilərin təxminən 2-3%-i ona səs verməyə hazır idi, lakin aprelin əvvəlində bir sıra sorğularda bu rəqəm daha yüksək olub və 8-9%-ə çatıb.

2018-ci il prezident seçkilərində Məhərrəm İncə Kamal Kılıçdaroğlunun rəhbərlik etdiyi Cümhuriyyət Xalq Partiyasının (CHP) namizədi olaraq 30%-dən çox səs toplasa da, 2021-ci ildə partiyadan ayrılaraq Məmləkət Partiyasını yaradıb.

İlkin məlumatlara görə, Türkiyədə bütün seçki məntəqələrində səslərin sayılmasından sonra Rəcəb Tayyib Ərdoğan 49,40 faiz, Kamal Kılıçdaroğlu 44,96, Sinan Oğan isə 5,2 səs toplayıb.

Namizədlərdən biri seçicilərin 50%-nin səsini toplayacağı təqdirdə seçkilər birinci turda başa çatacaq. Əks halda qalib mayın 28-də keçiriləcək ikinci turda müəyyənləşəcək. Seçkilərin birinci turunun yekun nəticələri mayın 19-da Türkiyənin rəsmi qəzetində dərc olunacaq.

Poliqon.info