Ukrayna hücuma qədər Kurskla bağlı planlarını Qərbdən gizlədib

Poliqon xəbər verir ki, Bloomberg Agentliyi bu barədə Qərb kəşfiyyatındakı mənbəyə istinadən yazıb.

Qeyd edilir ki, Ukraynanın Qərb müttəfiqləri onun Kursk bölgəsinə hücumunun təfərrüatlarını tam sürətlə davam edənə qədər bilməyiblər.

Ukraynalılar avqustun 6-da Rusiyaya qurudan hücuma başlayıblar. Hücum Ukraynanın Qərb tərəfdaşlarına da təsir edən "qatı müharibə dumanı" ilə örtülüb.

Məlumatlar Rusiya rəsmiləri, Rusiya hərbi bloqçuları və sosial media yazıları vasitəsilə daxil olub, onlardan bir neçəsini müstəqil şəkildə yoxlamaq mümkün olub. Ukraynalılar rəsmi olaraq konkret açıqlamalar vermədən fərdi bəyanatlarla çıxış ediblər. Bununla belə, diqqətlə planlaşdırılmış genişmiqyaslı əməliyyatın mənzərəsi ortaya çıxıb.

Planla tanış olan adını açıqlamayan Qərb rəsmisi deyib ki, Ukrayna Kurska zərbə də daxil olmaqla bir neçə ideya üzərində düşünür. Müttəfiqlər basqına artıq hərəkətdə olarkən reaksiya veriblər.

Ağ Evin sözçüsü Karin Jean-Pyer ABŞ-ın Ukraynadan strateji hədəfləri və planları haqqında daha çox məlumat verməsini istəyəcəyini deyib. Belə ki, o zaman Ukrayna məlumatın bir hissəsini artıq ABŞ-a vermişdi.

Prezident Volodimir Zelenski çərşənbə axşamı bildirib ki, onun qoşunları bölgədəki 74 yaşayış məntəqəsinə nəzarət edir, Ukrayna Silahlı Qüvvələrinin baş komandanı Aleksadr Sırskı isə Ukraynanın 600 kvadrat kilometrdən çox əraziyə nəzarət etdiyini açıqlayıb.

Bu arada, Rusiyanın Kursk və Ukrayna ilə həmsərhəd olan Belqorod vilayətinin qubernatoru fövqəladə vəziyyət elan edib.

Ukraynanın NATO-dakı müttəfiqləri bu hücuma əsasən susurlar, yalnız Avropa Komissiyası keçən həftə Ukraynanın Rusiya ərazisində fəaliyyət göstərmək üçün qanuni haqqı olduğunu bildirmişdi.

Ukrayna Kurskdakı hərəkətlərini və döyüş meydanında qərarların qəbulunu Qərb sponsorlarından asılı olmayaraq təsvir etməkdə maraqlıdır. Prezident Vladimir Putin isə bazar ertəsi hücumun müaəllifinin Qərb olduğunu iddia edib.

"Düşmən Qərb ağalarının köməyi ilə onların göstərişlərini yerinə yetirir, Qərb isə ukraynalılardan istifadə edərək bizə qarşı müharibə aparır", deyə Putin bildirib.

Poliqon.info