Mask Kadırova “Cybertruck” “hədiyyə” etməsini şərh edib

Amerikalı sahibkar İlon Mask “Tesla Cybertruck” elektrik avtomobilini Çeçenistan rəhbəri Ramzan Kadırova verməsi ilə bağlı məlumatı təkzib edib. 

 

Poliqon xəbər verir ki, bu barədə iş adamı X sosial şəbəkəsində yazıb.

Xatırladaq ki, avqustun 17-də Kadırov bu elektromobili Maskdan aldığını və artıq sınaqdan keçirdiyini açıqlayıb. O, həmçinin avtomobilin “xüsusi hərbi əməliyyat”da iştirak edən əsgərlərə veriləcəyini bildirib və Maskı Qroznıya səfərə dəvət edib.

Mask buna bir paylaşımda belə cavab verib: “Siz ciddi şəkildə o qədər axmaqsınız ki, mənim bir rus generalına “Cybertruck” verdiyimi düşünürsünüz?... Bu, ənənəvi medianın necə yalan danışdığına daha bir nümunədir”.

Qeyd edək ki, Kadırov “Cybertruck”u İlon Maskdan aldığını bildirməsi ilə yanaşı, Çeçenistanda elektrik avtomobilinə ağır pulemyot quraşdırıb. Kadırov özü maşını Qroznı ətrafında sürüb və ona sözün həqiqi mənasında maşına aşiq olduğunu etiraf edib.

Çeçenistan rəhbəri, həmçinin Tesla şirkətinin baş direktoruna və SpaceX-in yaradıcısına “səmimi minnətdarlığını” bildirib və onu “zəmanəmizin ən güclü dahisi və mütəxəssisi” adlandırıb.

“Tesla” da” Cybertruck”un Çeçenistan rəhbərinə təhvil verilməsini təsdiqləməyib.

Poliqon.info