Fox News telekanalının aparıcısı Şon Hanniti ABŞ prezidenti Co Baydeni Yaxın Şərqdəki Amerika hərbi bazalarına hücumlar fonunda İranın neft emalı zavodlarına zərbələr endirməyə çağırıb...
Poliqon xəbər verir ki, aparıcı dövlət başçısını "ciddi olduğunu" sübut etməyə dəvət edib.
"Əgər Co Bayden dünyaya ciddi olduğunu göstərmək istəyirsə, İranın neft emalı zavodlarını məhv etməlidir. Onları ağrıyacaqları yerdən vurun", deyə jurnalist bildirib.
Aparıcı həmçinin dövlət başçısını Vaşinqtonun Yaxın Şərqdəki siyasətinə görə tənqid edib.
"Co Bayden İraq və Suriyadakı qoşunlarımıza qarşı keçən həftə sonu baş verənlərə (ABŞ hərbi bazasına pilotsuz təyyarə hücumu) səbəb olan 200-ə yaxın hücuma göz yumdu. O, prezidentliyinin çox hissəsini İrana dəstək olmaq və İran mollalarının varlanmasına kömək etməklə keçirib. Unutmayın ki, bunların heç biri Donald Trampın dövründə baş verməyib", deyə jurnalist qeyd edib.
Yanvarın 28-nə keçən gecə İrana məxsus pilotsuz təyyarə Suriya və İordaniya sərhədində yerləşən ABŞ hərbi bazasına hücum edib. 3 əsgər ölüb, 20-dən çox əsgər yaralanıb. CNN-in məlumatına görə, Qəzzada müharibə başlayandan bəri ilk dəfədir ki, Vaşinqton regionda vəziyyətin gərginləşməsi səbəbindən şəxsi heyət arasında itki verir.
Poliqon.info