"Azərbaycan Körfəz Ərəb Dövlətləri Şurasının üzvü olan ölkələrlə siyasi əlaqələrə böyük önəm verir"
Bunu Bakıda keçirilən Azərbaycan-Körfəz Ərəb Dövlətləri Əməkdaşlıq Şurasına üzv ölkələri biznes forumunda iqtisadiyyat naziri Şahin Mustafayev bildirib.
Nazir bildirib ki, prezident İlham Əliyev Şura ölkələri ilə siyasi əlaqələrə xüsusi diqqət ayırır: "Prezident İlham Əliyevin bu ölkələrə səfəri siyasi əlaqələri gücləndirib və bu əməkdaşlıq böyük perspektiv vəd edir. İqtisadi əlaqələr də siyasi əlaqələr səviyyəsinə yüksəldilməlidir. Azərbaycanla Şura ölkələri arasında iqtisadi əlaqələr potensialdan aşağıdır".
Ş. Mustafayev əlavə edib ki, ötən il Şura ölkələri ilə ticarət dövriyyəsi 86 mln. dollar, bu ilin 8 ayında isə 40 mln. dollar təşkil edib. "Düzdür, ötən ilin müvafiq dövrü ilə müqayisədə ticarət dövriyyəsi 2 dəfə artıb. Bununla belə, iqtisadi əlaqələr mövcud potensialdan dəfələrlə aşağıdır. Körfəz ölkələrində ÜDM-in həcmi 1 trln. 360 mln. dollar təşkil edir. Körfəz ölkələrinin Azərbaycana qoyduğu investisiya 1 mlrd. 300 mln. dollardır. Bu investisiyada əsasən BƏƏ-nin, Səudiyyə Ərəbistanının və Bəhreynin payı var. Azərbaycanın isə Körfəz ölkələrinə qoyduğu investisiya 300 mln. dollar təşkil edir".
O vurğulayıb ki, Azərbaycanda Körfəz ölkələrindən olan 280 şirkət fəaliyyət göstərir.
Azərbaycanın sabit ölkə olduğunu qeyd edən nazir Körfəz ölkələrini Azərbaycanın müxtəlif sektorlarına investisiya qoymağa çağırıb.
pia.az
Digərxəbərlər
Populyar xəbərlər
