Azərbaycanda yeni kartof sortları yaradılır

Bunu “Report”a açıqlamasında İnstitutun İdarə Heyətinin sədri Elmar Allahverdiyev bildirib.

"Ötən il 4 yeni kartof sortuna patent almışıq. Bir neçə fermer onları öz əkin sahəsində sınaqdan keçirib və bəyənib. Bu il daha 5 sort qeydiyyata alınacaq. Bizim sortlar Avropa və digər ölkələrdən gətirilən sortlardan heç də geri qalmır. Yeni 5 sorta patent əldə edildikdən sonra onların ilkin toxumçuluğu sürətli şəkildə təşkil ediləcək və toxumçu fermerlərə təqdim olunacaq", - deyə o qeyd edib.

“Dünyada belə bir tendensiya var ki, torpağın keyfiyyəti aşağı olan yerlərdə də müasir suvarma sistemlərinin və gübrələmənin hesabına kartof yetişdirilir. Ancaq Azərbaycanda, xüsusilə də dağlıq və dağətəyi rayonlarda orqanik tələblərə cavab verən kartof yetişdirilir. Ona görə də həmin ərazilərdəki məhsula istehlakçıların daha çox tələbatı var. Bizdə insan səhhətinə ziyanı olmayan həddə gübrələrdən istifadə olunur”,- deyə E.Allahverdiyev əlavə edib.

Onun sözlərinə görə, hazırda ölkədə həm faraş, yəni tezyetişən, həm də gecyetişən (dağlıq ərazilərdə) kartof yetişdirilir: "Faraş toxumlar fevralın sonuna qədər əsasən Cəlilabad və Masallı rayonlarında, həmçinin Şəmkir və Tovuz rayonlarının aran hissələrində əkilir, mayın sonlarına qədər yığılır. Azərbaycandan ixrac edilən kartof əsasən faraş kartofdur və fermerlərə yüksək gəlir gətirir. Gecyetişən toxumlar isə aprel-may aylarında əkilir, sentyabr-oktyabr aylarında yığılır. Son vaxlar ənənəvi kartofçuluq rayonları sayılmayan Qəbələ, İsmayıllı, Zaqatala kimi dağlıq və dağətəyi rayonlarda kartof əkinləri genişlənir. Qusar rayonunun da kartofçuluq potensialı böyükdür. Bura xüsusilə kartof toxumçuluğu üçün əlverişlidir. Dağlıq və dağətəyi ərazilərdə əkilən kartof dadına görə üstündür. Azərbaycanın kartofa olan illik tələbatı təxminən 1 milyon tondur. Ölkədə istehsalın illik həcmi isə 1,2 milyon tondur. Odur ki, Rusiyaya ixrac həyata keçirilir".

Poliqon.info