Sumqayıt şəhər sakini Rəhim Quliyev Abşeron-Xızı Regional Təhsil İdarəsinin müdiri İlhamə Abdullayevadan şikayətçidir.
O, bu barədə Bakupost.az -a açıqlamasında bildirib.
R.Quliyevin sözlərinə görə, bu il övladı birinci sinfə gedəcək:
"Biz onu rus sektoruna qoymaq istəyirik. Lakin Abşeron-Xızı Regional Təhsil İdarəsinin müdiri İlhamə Abdullayevanın müdaxilə etməsi səbəbindən qızım imtahandan kəsilib".
Şikayətçinin sözlərinə görə, mayın 31-də 1 rus dili üzrə şifahi nitq bacarıqlarının qiymətləndirilməsi keçirilib. Lakin qızı Selin Quliyeva qanunsuz olaraq, komissiya tərəfindən imtahandan kəsilib:
"Halbuki uşaq 12 sualdan 8-nə səlis cavab verib. Digər suallar zamanı utanıb, sıxılıb. Amma özünü itirməyib. Çünki uşaq 2 ildir həm bağçada, həm də repetitor yanında fərdi qaydada rus dili fənni üzrə imtahana hazırlaşıb. Evdə də daim uşaqlarla rus dilində danışırıq".
Abşeron-Xızı Regional Təhsil İdarəsinin müdiri İlhamə Abdullayevanın rus sektoruna qəbula şəxsən nəzarət etdiyini diqqətə çəkən R.Quliyev iddia edir ki, intahan obyektiv keçirilməyib:
"İdarə müdirinin göstərişinə əsasən övladıma qarşı ədalətsizlik edilib. Ya onun verdiyi imtahanın nəticələri düzgün qiymətləndirilməli, ya da yenidən imtahan verməsi üçün şərait yaradılmalıdır".
Şikayətçi məsələ ilə bağlı ərizə ilə İ.Abdullayevaya müraciət edib. Hələlik müraciətinə cavab almayan valideyn belə vəziyyətdə nə edəcəyini bilmir:
“Ölkəmizdə təhsil məcburidir. Uşağımı rus dili imtahanından kəsiblər. Əgər o, rus sektorunda oxuya bilməyəcəksə, biz nə etməliyik? Axı uşaq illərdir bu fənnə hazırlaşır, rus dilindən məşğələlərə gedir. Bizimlə də evdə daim ruc dilində danışıb. İndi onu Azərbaycan sektoruna qoysam belə, oxuya bilməyəcək. Bunun üçün ən azından hazırlaşmalıdır. Bəs, indi nə edək?! Niyə ilk gündən ədalətsizlik edir, uşağı imtahandan kəsib ona psixoloji zərbə vururlar?".
Məsələ ilə bağlı Abşeron-Xızı Regional Təhsil İdarəsinin müdiri İlhamə Abdullayeva ilə əlaqə saxlamaq cəhdimiz baş tutmadı.
Poliqon.info