Yens Stoltenberq: NATO bu hadisədən şoka düşüb və dəhşətə gəlir...

Poliqon xəbər verir ki, bunu blokun baş katibi Yens Stoltenberq Şimali Atlantika Alyansı ölkələrinin Baş Qərargah rəislərinin iclasının açılışında deyib.

"İcazə verin, baş nazir Robert Fikoya sui-qəsd cəhdindən sonra Slovakiya ilə həmrəyliyimi bildirim. Mən Fiko ilə təxminən 20 il işləmişəm, biz bu sui-qəsd cəhdindən şoka düşdük və dəhşətə gəldik. Bu, demokratiyanın istənilən ideallarını pozur", deyə Stoltenberq bildirib.

O, müvafiq zorakılıq aktlarının yolverilməz olduğunu vurğulayıb.

Xatırladaq ki, mayın 15-i axşam saatlarında Slovakiyanın baş naziri Robert Fiko Qandlova şəhərində Nazirlər Kabinetinin iclasından sonra baş verən atışmada yaralanıb. Hadisə şahidlərinin sözlərinə görə, tədbirin sonunda siyasətçi yerli sakinlərə yaxınlaşıb. Sonra izdihamdan bir neçə atəş səsi eşidilib və Fiko yerə yıxılıb. Baş nazir döş qəfəsindən və mədəsindən yaralanıb, helikopterlə Bratislavadakı xəstəxanaya aparılıb. Sonradan məlum olub ki, Fikonu 71 yaşlı yazıçı Juraj Cintula vurub.

Poliqon.info