Welt: Fransadakı hadisələr Almaniyada təkrarlana bilər...

Poliqon xəbər verir ki, bu barədə Welt qəzeti Almaniya Polis Həmkarlar İttifaqının (GPD) sədri Yoxen Kopelkenin bəyanatına istinadən məlumat yayıb.

“Almaniyanın bəzi yerlərində bu cür iğtişaşlar mümkündür, çünki ölkədə demokratiyadan, dövlətdən və dövlət hakimiyyətindən imtina getdikcə artır”, deyə Kopelke bildirib.

Oxşar bəyanatla Almaniya Sosial Assosiasiyasının (SoVD) rəhbəri Mixaela Engelmayer çıxış edib. Onun sözlərinə görə, Almaniya hakimiyyəti tədbir görməlidir, çünki artıq bu gün təmsilçilik hissinin olmaması siyasətdə məyusluğa, kənar partiyalara səs vermək istəyinin artmasına və siyasi ekstremizmə təsir edir.

Welt qeyd edir ki, Kopelke və Engelmeyer ölkədəki vəziyyətin hazırda Fransada polis zorakılığına qarşı etirazlarla müqayisə edilə bilməyəcəyini vurğulayıblar.

İyunun əvvəlində bir neçə ictimai rəy sorğusu ilk dəfə olaraq sağçı populist Almaniya üçün Alternativ (AfD) partiyasını bütün partiyalar arasında ikinci ən populyar partiya (17%-dən 20%-ə) seçib. Birinci yerdə hazırda müxalifətdə olan Xristian Demokrat İttifaqı (CDU), üçüncü yerdə isə Olaf Şoltsun rəhbərlik etdiyi Almaniya Sosial Demokrat Partiyası (SPD) qərarlaşıb.

Fransada hadisələr iyunun 27-dən davam edir. Etirazlara səbəb 17 yaşlı yeniyetmənin yolda sənədləri yoxlayarkən polis əməkdaşı tərəfindən güllələnərək öldürülməsi olub. İyulun 3-nə keçən gecə 157 nəfər saxlanılıb, 297 avtomobil və 34 bina yandırılıb. Beş gecəlik etiraz aksiyasında 5000 avtomobil və 1000 bina yandırılıb, polis məntəqələrinə 250 hücum qeydə alınıb, 700-dən çox polis əməkdaşı yaralanıb.

Poliqon.info