Soledarda döyüşlər haqqında nə məlumdur? – “Vaqner” şəhəri işğal edibmi?

PİA.az xəbər verir ki, yanvarın 11-nə keçən gecə “Vaqner” ÖHŞ-nin təsiscisi Yevgeni Priqojin xəbər verib ki, onun bölmələri Baxmutdan 10 km şimalda yerləşən Donetsk vilayətinin kiçik şəhəri olan Soledarın bütün ərazisini nəzarətə götürüb. “Şəhərin mərkəzində bir qrup Ukrayna hərbiçisi mühasirəyə düşüb. Əsirlərin sayı sabah açıqlanacaq”, deyə Priqojin bildirib.

Priqojinin mətbuat xidməti silahlı insanların əhatəsində olan iş adamının fotosunu dərc edib. Oxşar şəkli RİA Novosti dövlət agentliyi yayıb. Onun mesajında deyilir ki, ““vaqnerçilər” Soledar şaxtaları azad ediblər”. Foto azad edilmiş duz mədənlərindən birində çəkilib.

Yanvarın 9-da səhər Britaniya kəşfiyyatı Soledar şəhərində tərk edilmiş şaxtaların uzunluğunun təxminən 200 km olduğunu və hər iki tərəfin bu şaxtalardan döyüşlərdə istifadə etdiyini qeyd edib.

Rusiyalı “jurnalist” Yuriy Podolyaka axşam saatlarında yazıb ki, Soledardakı Ukrayna qoşunlarına ultimatum verilib, onlar yanvarın 11-i saat 00:00-a qədər təslim olmalıdırlar. Gecə Podolyaka bildirdi ki, onun məlumatına görə, şəhər ələ keçirilib.

Amerika Müharibənin Araşdırılması İnstitutu (ISW) oktyabrın 10-na olan hesabatında yazır ki, Soledar üzərində Rusiyanın tam nəzarəti ilə bağlı heç bir dəlil yoxdur. Analitiklər qeyd edirlər ki, şəhər döyüşləri zamanı vəziyyət sürətlə dəyişir, ona görə də müəyyən məhəllələrə kimin nəzarət etdiyini qiymətləndirmək çətindir. ISW ekspertlərinin fikrincə, Soledarın ələ keçirilməsi nə Baxmutun mühasirəyə alınması, nə də Ukrayna qrupunun təchizatının nəzarətə götürülməsi demək deyil.

Yanvarın 10-da axşam CNN telekanalı Ukrayna Silahlı Qüvvələrinin Soledarı müdafiə edən 46-cı Hava Hücum Briqadasının üzvü ilə danışıb. “Vəziyyət kritik və mürəkkəbdir. Ancaq biz sona qədər dayanacağıq” deyən hərbçilər bildiriblər ki, şəhərdə o qədər çox ölü var ki, onları heç kim saymır. Hərbiçilərin sözlərinə görə, son günlər şəhərdə mövqelər mütəmadi olaraq bir tərəfdən digər tərəfə keçir.

Qeyd edək ki, rəsmi olaraq Rusiya və Ukrayna tərəfi Soledarın mümkün ələ keçirilməsi ilə bağlı şərh verməyib.

pia.az