Bu gün Soçidə liderlərin üçtərəfli görüşü baş tutacaq...
“Görüş ərəfəsində Rusiya kütləvi informasiya vasitələrinin, eləcə də Putinin “Valday” diskussiyalarında söylədiyi fikirlər müəyyən ehtiyatlılıq hissləri yaradır”.
Bu sözləri politoloq Qabil Hüseynli bu gün baş tutması gözlənilən Soçi görüşünü PİA.az-a şərh edərkən qeyd edib.
Xəbər verdiyimiz kimi bu gün Soçidə liderlərin üçtərəfli görüşü baş tutacaq. Bu görüşdən gözləntiniz nədir və Soçi görüşü Praqa görüşünün davamı olacaq?
Soçi görüşünü PİA.az-ın əməkdaşı politoloq Qabil Hüseynli ilə müzakirə edib.
Qabil Hüseynli: “Düşünürəm ki, Soçi görüşü Praqa görüşünün davamı olmayacaq”.
Dünən Rusiyanın Xarici İşlər Nazirliyinin bəyanat yayaraq Soçi görüşündən sülh nəticələrinin çıxa biləcəyi haqqında fikirlər səsləndirdiyini xatırladan politoloq PİA.az-a bildirib ki, bu məsələlərdə birmənalı fikir söyləmək mümkün deyil:
“Görüş ərəfəsində Rusiya kütləvi informasiya vasitələrinin, eləcə də Putinin “Valday” diskussiyalarında söylədiyi fikirlər müəyyən ehtiyatlılıq hissləri yaradır. Yəni açıq-aşkar bəlli olur ki, Rusiya necə işğal prosesində Ermənistanı müdafiə etdi, indi də sülhyaratma məsələsində Ermənistanın tərəfində durmağa hazırlaşır.
Üstəlik də Rusiyanın kütləvi informasiya vasitələrində “Dağlıq Qarabağ Respublikası” adlı o dünyaya göndərilmiş terminin tez-tez təkrarlanması və bunun ətrafında erməni mənşəli politoloqların çıxışının geniş yayılması Soçi görüşündə müzakirə ediləcək məsələlərə ciddi kölgələr salır.
Düzdür, dünən Rusiyanın Xarici İşlər Nazirliyi bəyanat yayaraq Soçi görüşündən sülh nəticələrinin çıxa biləcəyi haqqında fikirlər səsləndirdi. Amma hələ ki, bu məsələləri birmənalı söyləmək mümkün deyil.
Düşünürəm ki, Soçi görüşü Praqa görüşünün davamı olmayacaq. Əksinə özünün ləngitmə və müxtəlif strateji maraqları güdmək baxımından Soçi görüşü sülh yaratmaq prosesi yolunda yeni əngəllər yarada bilər”.
Nərminə UMUDLU
pia.az