Ukrayna Silahlı Qüvvələri döyüş qabiliyyətini qoruyub saxlayır və yenidən əks-hücuma cəhd edə bilər...
Poliqon xəbər verir ki, bunu Rusiya Federasiyası Silahlı Qüvvələri Baş Qərargah rəisinin birinci müavini Sergey Rudskoy bildirib. General belə bir ssenarinin Kiyevin müttəfiqlərinin dəstəyi ilə mümkün olduğunu hesab edir.
“Ukrayna Silahlı Qüvvələri aktiv əməliyyatlar aparmaq üçün öz döyüş qabiliyyətini hələ də saxlayır. Gələcəkdə Qərbin irimiqyaslı hərbi yardımı olacağı təqdirdə, növbəti əks-hücum cəhdini də istisna etmək olmaz”, deyə general-polkovnik “Krasnaya Zvezda” qəzetinə bildirib.
Rudskoy bununla yanaşı, Ukraynadakı problemləri, genişmiqyaslı iqtisadi böhranı, sənaye potensialının əhəmiyyətli hissəsinin itirilməsini, xammal tədarükündə fasilələri, logistika ilə bağlı çətinlikləri və kütləvi səfərbərlik kimi problemləri qeyd edib. Rusiya Baş Qərargah rəisinin birinci müavininə görə, Ukrayna Silahlı Qüvvələri hazırda mühüm əraziləri və mövqeləri tutmaq üçün səylərini müdafiəyə yönəldir.
General-polkovnik hesab edir ki, Ukraynanın yayda başlatdığı əks-hücum uğursuz olub. Onun fikrincə, buna rus qoşunlarının təlimi kömək edib.
Poliqon.info