Azərbaycan Demokratiya və Rifah (ADR) Partiyasının təsis qurultayının gündəliyi açıqlanıb. Qurultay oktyabrın 17-si internet vasitəsilə keçiriləcək.
Partiya Azərbaycan Demokratiya və Rifah Hərəkatının bazasında qurulur. 2015-ci ildə yaradılmış təşkilata iqtisadçı alim Qubad İbadoğlu sədrlik edir.
Novator.az-ın məlumatına görə, Qubad İbadoğlu yazır ki, oktyabrın 13-də qurultaya hazırlıq üzrə təşkilat komitəsinin toplantısı keçirilib: “İclasda ADR Partiyasının təsis qurultayının müzakirəsinə təqdim ediləcək sənədlərin yekun layihələri müzakirə olunub, qurultay öncəsi durum dəyərləndirilib, təşkilat komitəsi üzvləri arasında iş bölgüsü aparılıb. Qurultayda partiyanın nizamnamə və proqramı qəbul ediləcək, partiya sədri, Mərkəzi Nəzarət-Təftiş Komissiyasının üzvləri seçiləcək, Ali Məclisin tərkibi təsdiqlənəcək”.
Siyasi partiyanın qeydiyyatı üçün azı 1000 vətəndaş onun üzvü olmalıdır. Hazırda ölkədə 56 siyasi partiyanın dövlət qeydiyyatı var.
Qubad İbadoğlu 1971-ci il sentyabrın 12-də Füzuli rayonunun Aşağı Güzlək kəndində doğulub. Azərbaycan Dövlət İqtisad Universitetini və həmin təhsil ocağının aspiranturasını bitirib. İqtisad elmləri namizədidir.
Azərbaycan Dövlət İqtisad Universitetində və dünyanın bir çox ölkəsinin ali məktəbində dərs deyib, “Ekonomiks” qəzetinə, “Ekspert” jurnalına baş redaktorluq, İqtisadi Tədqiqatlar Mərkəzinə rəhbərlik edib, 2014-2015-ci illərdə BMT-nin İnkişaf Proqramının xətti ilə Qırğızıstan hökumətində müşavir vəzifəsində çalışıb.
Uzun illər Müsavat Partiyasının rəhbərliyində təmsil olunub.
pia.az