Dünən Tbilisidə keçirilən mitinqdə səkiz nəfər xəsarət alıb

Mayın 1-də Tbilisidə əcnəbi agentlər haqqında qanuna qarşı keçirilən mitinq zamanı azı səkkiz nəfər xəsarət alıb, onların hamısı xəstəxanalara aparılıb.

Poliqon xəbər verir ki, bu barədə Gürcüstan Səhiyyə Nazirliyi məlumat yayıb. Qeyd edək ki, artıq etiraz aksiyası başa çatıb

“Mayın 1-də Rustaveli prospektində keçirilən etiraz aksiyası zamanı 8 mülki şəxs yaralanıb. Onlar xəstəxanaya yerləşdirilib. Onlardan biri artıq evə buraxılıb”, deyə “Rustavi2” telekanalı Gürcüstan səhiyyə departamentinə istinadən bildirib. Zərərçəkənlərin əksəriyyəti üz, baş və bədənin digər nahiyələrindən xəsarətlər alıb. Bəzi etirazçılar tənəffüs yollarında ağırlaşmalar keçiriblər.

Qeyd edək ki, mayın 2-nə keçən gecə Gürcüstan parlamentində qırmızı təhlükəsizlik səviyyəsi elan edilib və qurumun əməkdaşlarına binanı tərk etmək əmri verilib. Yerli vaxtla saat 03:30 radələrində (Moskva vaxtı ilə 02:30) etirazçılar parlament binasının birinci mərtəbəsindəki pəncərəni dəmir boru ilə sındıraraq otaqlardan birinə bir neçə tüstü bombası atıblar. Bundan sonra Gürcüstan Daxili İşlər Nazirliyinin əməkdaşları parlament binası yaxınlığında etirazçıları kütləvi şəkildə saxlamağa başlayıblar.

Hazırda parlament binası yaxınlığında cəmi onlarla etirazçı qalıb. Polisdən bildiriblər ki, tezliklə şəhər xidmətləri Rustaveli prospektində görünəcək və yolun hərəkət hissəsini təmizləyəcək.

Poliqon.info