Cənubi Koreya, Çin və Yaponiya sentyabrın 26-da üçtərəfli əməkdaşlığı müzakirə edəcəklər...
Cənubi Koreya Respublikası, Çin və Yaponiya üçtərəfli əməkdaşlığı, o cümlədən üç ölkənin sammitinin keçirilməsi imkanlarını müzakirə etmək üçün sentyabrın 26-da Seulda yüksək vəzifəli şəxslərin görüşünü keçirməyi planlaşdırır.
Poliqon Yonhap Agentliyinə istinadən xəbər verir ki, bu barədə Cənubi Koreya Xarici İşlər Nazirliyi məlumat yayıb. Məlumata görə Cənubi Koreyanı xarici işlər nazirinin köməkçisi Çon Byon Von, Yaponiyanı Yaponiya Xarici İşlər Nazirliyinin Asiya və Okeaniya departamentinin rəhbəri Takehiro Funakoşi, Çini isə Çinin xarici işlər nazirinin köməkçisi Nonq Ronq təmsil edəcək.
“Üç dövlətin nümayəndələri yüksək səviyyəli görüşdə üçtərəfli əməkdaşlıq üzrə məşvərətçi orqanla bağlı məsələləri müzakirə edəcək, üçtərəfli əməkdaşlığın hazırkı vəziyyətini qiymətləndirəcək və onun gələcək inkişafı istiqamətləri barədə fikir mübadiləsi aparacaqlar”, deyə XİN-in mətbuat xidmətindən bildirilib. .
Bundan əlavə, nazirlik rəsmisi bildirib ki, tərəflər 2023-cü ildə üçtərəfli sammitin keçirilməsi imkanını müzakirə edəcəklər.
“Hazırda üçtərəfli sammit müzakirə olunur, məqsəd sammiti bu il keçirməkdir”, deyə Cənubi Koreya diplomatı qeyd edib. O, bu məsələyə həsr olunmuş xarici işlər nazirləri səviyyəsində görüşün təşkil olunacağını istisna etməyib.
Qeyd edək ki, ÇXR, Cənubi Koreya Respublikası və Yaponiyanın üçtərəfli sammiti ilk dəfə 2008-ci ildə keçirilib, səkkiz belə görüş təşkil edilib, sonuncusu isə 2019-cu ildə olub. Format Seul və Tokio arasında məcburi əmək qurbanlarına təzminat ödənilməsi ilə bağlı fikir ayrılıqları, eləcə də pandemiya səbəbindən dayandırılıb. 2022-ci ildə Cənubi Koreya Respublikasında yeni prezident Yun Syok Yöl hakimiyyətə gələndən bəri Yaponiya ilə ikitərəfli əlaqələrdə istiləşmə müşahidə olunur.
Poliqon.info