ABŞ-ın Ukraynaya yeni hərbi yardım paketi...

ABŞ yeni hərbi yardım paketində “Patriot” zenit-raket kompleksləri və HIMARS reaktiv yaylım atəşi sistemləri, həmçinin hava hücumundan müdafiə sistemləri üçün sursatla Ukraynanı təmin edəcək.

Poliqon xəbər verir ki, bunu Ağ Evin Milli Təhlükəsizlik Şurasının Strateji Kommunikasiyalar Direktoru Con Kirbi mətbuat konfransında bildirib.

“Bu paketin bir hissəsi olaraq, biz Ukraynaya Patriot üçün əlavə döyüş sursatı, həmçinin daha çox “Avenger” və “Stinger” hava hücumundan müdafiə sistemləri və təbii ki, HIMARS üçün sursat, artilleriya, tank əleyhinə silahlar verəcəyik”, deyə Kirbi brifinqdə bildirib.

Qeyd edək ki, söhbət Ukraynaya 39-cu yardım paketindən gedir. Pentaqon aydınlaşdırıb ki, Ukraynaya göndərilən yeni silah və sursatların növbəti partiyasının dəyəri 300 milyon dollardır.

Yardım paketinə həmçinin AIM-7 “Sparrow” hava-hava raketləri, 155 və 105 mm-lik top mərmiləri, 105 mm-lik tank mərmiləri, gəzinti sursatları, “Zuni” idarə olunmayan hava-hava raketləri, PUA döyüş sursatları, əldə tutulan tank əleyhinə AT4 qumbaraatanlar daxildir. Bundan əlavə, Birləşmiş Ştatlar Kiyevə 30 milyondan çox patron, minatəmizləmə avadanlığı, partlayıcı maddələr, gecəgörmə cihazları, enerji generatorları və digər sahə avadanlığı vermək niyyətindədir.

Xatırladaq ki, aprelin sonunda ABŞ-ın Ukraynaya hərbi yardımının ümumi dəyəri təqribən 36 milyard dollara çatıb.

Poliqon.info