İqtisadçı alim, Azərbaycan Demokratiya və Rifah Hərəkatının sədri Qubad İbadoğlu rəsmi ölüm statistikasına nəzər salıb.
Alim yazır ki, Dövlət Statistika Komitəsi Azərbaycanda əhalinin hər 1000 nəfərinə ölüm səviyyəsini 2018-ci ildə 5,8 nəfər, 2019-cu ildə 5,6 nəfər, 2020-ci ildə 7,6 nəfər, 2021-ci ilin ilk iki ayında 8,2 nəfər göstərib: “2020-ci ilin Vətən müharibəsində 3000 nəfərə qədər şəhid verdiyimizdən və koronavirus itkiləri səbəbindən əhalinin hər 1000 nəfərinə ölüm səviyyəsi göstəricisi yüksəlib. Bu il koronavirus səngiməsə də, müharibə yoxdur, nədən ölüm səviyyəsi bu qədər artıb? Bəlkə koronavirusdan ölənlər açıqlandığından çoxdur?
Ölüm statistikası həyəcan təbili çalır. Bu artımın səbəbləri araşdırılmalıdır. Məncə, əhalinin hər 1000 nəfərinə ölüm səviyyəsi göstəricisi hazırkı psixoloji və sosial-iqtisadi durumla birbaşa əlaqəlidir. Son vaxtlar intiharlar artıb, işsizlik, yoxsulluqdan əziyyət çəkənlər çoxalıb.
Əhalinin hər 1000 nəfərinə ölüm səviyyəsi göstəricisi həm də səhiyyənin bərbad vəziyyətini xarakterizə edir. Bunu 2019-cu ildə ölümlərin 41 faizinin 65 yaşa qədər olması da təsdiq edir” .
Dövlət Statistika Komitəsinin hesabatına görə, 2021-ci ilin yanvar-fevral aylarında ölkədə 13338 ölüm halı qeydə alınıb.
2020-ci ildə Azərbaycanda 75647 ölüm rəsmiləşib. Bu, 2019-cu illə müqayisədə 35,7% çoxdur.
2000-ci ildə ölkədə 46701 ölüm olub. 2001-ci ildə 45284 nəfər, 2002-ci ildə 46522 nəfər, 2003-cü ildə 49001 nəfər, 2004-cü ildə 49568 nəfər, 2005-ci ildə 51962 nəfər dünyasını dəyişib.
Sonrakı illərin rəsmi statistikası belədir:
2006-cı il – 52248 ölüm
2007-ci il – 53655
2008-ci il – 52710
2009-cu il – 52514
2010-cu il – 53580
2011-ci il – 53762
2012-ci il – 55017
2013-cü il – 54383
2014-cü il – 55648
2015-ci il – 54697
2016-cı il – 56648
2017-ci il – 57109
2018-ci il – 57250
2019-cu il – 55916.
pia.az