ABŞ-ın Fox News kanalı 2020-ci il seçkilərində saxtakarlıq iddialarına görə səsvermə sistemini quran “Dominion” şirkətinə 787 milyon dollar ödəməyə razılaşıb...
Poliqon xəbər verir ki, seçkidən dərhal sonra bir çox şərhçi Fox News-da çıxış edərək, Donald Trampın seçkidə qalib gəldiyini, lakin səsvermə sistemində saxtakarlıq edilərək Co Baydenin qalib göstərildiyini iddia etmişdi.
Bundan sonra “Dominion” rəhbərliyi şirkətə böhtan atıldıqlarını əsas gətirərək, Fox News-a qarşı 1,6 milyard dollarlıq təzminat iddiası qaldırmışdı.
Lakin məhkəmə dinləmələri başlamazdan əvvəl tərəflər barışığa gediblər. Bu razılaşma olmasaydı, Fox News-un icraçı direktoru Rupert Merdoç bir çox məşhur aparıcılarla birlikdə məhkəmədə ifadə verməli olacaqdı.
“Bu kompromis bizim jurnalist standartlarına nə qədər sadiq olduğumuzu nümayiş etdirir”, deyə razılaşma ilə bağlı açıqlama verən Fox News-dan bildirilib.
“Dominion”un icraçı direktoru Con Poulos isə “Fox yalan danışdığını etiraf etdi. Mənim şirkətim bu yalanlara görə çox zərər çəkib”, deyə bildirib.
Poliqon.info