Kreml Rusiyada keçirilən prezident seçkilərinin ilkin nəticələrini şərh edib

Hazırkı dövlət başçısı Vladimir Putinin 87 faizdən çox səs topladığı Rusiya prezident seçkilərinin ilkin nəticələri görünməmiş nəticədir.

Poliqon TASS Agentliyinə istinadən xəbər verir ki, bunu Kremlin rəsmi nümayəndəsi Dmitri Peskov deyib.

“Baxın, 24 il hakimiyyətdə olduqdan sonra təxminən 87% səslərin əldə edilməsi inanılmaz dərəcədə görünməmiş nəticədir” deyə prezidentin sözçüsü nəticələrin şəffaflığını vurğulayaraq bildirib.

Peskov həmçinin qeyd edib ki, hər kəs seçkilərin legitimliyini yoxlaya və onu müşahidə edə bilər. Amma söhbət Rusiyanın işlərinə qarışmağa cəhd edən arzuolunmaz təşkilatlardan getmir.

Mərkəzi Seçki Komissiyasının son məlumatlarına görə, protokolların 99,43 faizinin işlənməsinin nəticələrinə əsasən, prezidentliyə namizəd Vladimir Putin 87,32 faiz səs toplayıb. İkinci yerdə 4,32 faiz səslə Rusiya Kommunist Partiyasının namizədi Nikolay Xaritonov, 3,79 faiz səslə “Yeni insanlar”dan Vladislav Davankov üçüncü yerdədir. Dördüncü yeri hazırda 3,19 faiz səslə LDPR-nin namizədi Leonid Slutski tutur. Seçkilərdə fəallıq 74 faizi ötüb.

Poliqon.info