Hindistan və ABŞ Alyaskada hərbi təlimlər keçirəcək...

Hər iki tərəfdən təlimlərə cəlb olunan hərbi qulluqçuların sayı, silahların tərkibi və qarşıya qoyulan vəzifələr açıqlanmayıb...

Hindistan və ABŞ daha sıx hərbi əməkdaşlığa diqqət yetirərək sentyabrın 25-dən oktyabrın 8-dək Alyaskada 19-cu “Yudh Abhyas” hərbi təlimi keçirəcək.

Poliqon xəbər verir ki, bu barədə Amerikanın News18 telekanalı məlumat yayıb. Xəbərdə hər iki tərəfdən təlimlərə cəlb olunan hərbi qulluqçuların sayı, silahların tərkibi və qarşıya qoyulan vəzifələr açıqlanmayıb. Bununla belə, Hindistan ordusu tərəfindən Alyaskaya “Maratha” yüngül piyada alayının hərbi qulluqçularının göndəriləcəyi məlumdur.

BMT-nin mandatına uyğun olaraq təlim cədvəlinə sülhməramlılıq və sülhün mühafizəsi ilə bağlı bütün əməliyyatlar, həmçinin humanitar və təbii fəlakətlərin nəticələrinin aradan qaldırılması əməliyyatları da daxil ediləcək. Hər iki ölkənin qoşunları hər hansı təbii fəlakət zamanı sürətli və koordinasiyalı yardım əməliyyatları keçirməyi məşq edəcək.

Qeyd edək ki, İlk Yudh Abhyas hərbi təlimi 2002-ci ildə Hindistanın Çunləı sərhədində keçirilib. O vaxtdan bəri, ABŞ və Hindistan silahlı qüvvələri arasında ən yaxşı təcrübə, taktika, metod və prosedurların mübadiləsi üçün hər il hər iki ölkənin orduları tərəfindən keçirilir.