Ermənistanın Gəncəyə raket hücumu nəticəsində ölənlərin sayı 13-ə çatıb - Yenilənib

Ermənistan silahlı qüvvələrinin Gəncə şəhərini raket atəşinə tutması nəticəsində ölənlərin sayı 13 nəfərə çatıb

"Report"un yerli bürosunun məlumatına görə, dağıntılar altından daha bir nəfərin meyiti tapılıb.

Düşmənin raket hücumu nəticəsində 40-dan çox şəxs yaralanıb, çoxsaylı mülki infrastruktur obyektlərinə, nəqliyyat vasitələrinə külli miqdarda ziyan dəyib.

Qeyd edək ki, Ermənistan silahlı qüvvələri bu gün gecə saat 1 radələrində Gəncənin mərkəzi hissəsində yerləşən dinc sakinlərin yaşayış məntəqələrini raket atəşinə tutub.

***

Hikmət Hacıyev: “Ermənistanın Gəncəyə raket hücumu nəticəsində 10-dan çox dinc sakin ölüb, təxminən, 40 nəfər yaralanıb”

“Ermənistanın Gəncəyə raket hücumu nəticəsində 10-dan çox mülki şəxs ölüb, təxminən 40, nəfər yaralanıb. Xilasetmə əməliyyatları davam edir. Ermənistanın dövlət terroru siyasətinə son qoyulmalıdır”.

Bunu Azərbaycan Respublikası Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev “twitter” hesabında yazıb.

***

“Ermənistanın Gəncəyə raket hücumu nəticəsində ölənlərin sayı 6-ya çatıb. Yaralıların sayı 35 nəfərdir. Təcili yardım xidmətləri tərəfindən mülki şəxslərin dağıntılar altından xilas etdirilməsi işləri davam etdirilir”.

Düşmənin raket hücumu nəticəsində Gəncədə həlak olanların sayı 6-ya çatıb. 

Bunu “Haber Global” telekanalına müsahibəsində Prezidentin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib. 

O bildirib ki, dağıntılar altında qalanlar və axtarış-xilasetmə işləri davam etdirilir. 

H.Hacıyev Mingəçevirə düşmən tərəfindən edilən hücumla bağlı da danışıb:

“Mingəçevirə 5-6 raketin atıldığı qeyd edilir. Onlar Hava Hücumundan Müdafiə sistemləri tərəfindən məhv edilib. Bu hücumlar Ermənistan hərbi-siyasi hakimiyyətinin əsl üzünü göstərir. Xocalıdan bu günə qədər Ermənistan Azərbaycan xalqına qarşı qətliam siyasətini yürüdür”.

***

Ermənistan silahlı qüvvələrinin Gəncəni raket atəşinə tutması nəticəsində beş nəfər ölüb, 35 nəfər xəsarət alıb. 

Bunu Prezidentin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev “Twitter” hesabında yazıb.

O bildirib ki, ölənlərdən ikisi uşaqdır:

“Axtarış-xilasetmə işləri davam etdirilir. Ermənistan terror və müharibə cinayətlərini davam edir”.

H.Hacıyev digər tvitində isə Ermənistanın məsuliyyətə cəlb edilməli olduğunu bildirib.

“Azərbaycan mülki əhalisinə olan qorxaq və xain raket hücumları, o cümlədən Gəncəyə növbəti raket zərbələri, Ermənistanın dövlət səviyyəsində terror və soyqırım aktı siyasətini davam etdirdiyini göstərir. Ermənistan məsuliyyətə cəlb edilməlidir”, - H.Hacıyevin paylaşımında bildirilir. 

pia.az