Ermənistandakı separatçılar aktivləşib - Paşinyan höküməti isə bu çağırışlara göz yumur...

Politoloq: “Qarabağ mövzusu Azərbaycan və Ermənistan arasında keçirilən danışıqlardan kənarlaşdırılıb. Bu da təbiidir”.

“Əlbəttə, Ermənistanın siyasi rəhbərliyi bu seperatçı düşüncədə, revanşizmin iddiasında olan fikirləri əlində rəhbər tutarsa, bu Ermənistanın siyası rəhbərliyinin sülhdən maraqlı olmadığını göstərəcək”.

Bu sözləri politoloq İlyas Hüseynov Qarabağ separatçılarının aktivləşməsini Poliqon-a şərh edərkən qeyd edib.

Qarabağ separatçılarının son lideri Samvel Şahramanyan 44 günlük müharibənin şərtlərini araşdırmaq üçün Ermənistan parlament komissiyasının iclasında iştirak etdikdən sonra İrəvan hakimiyyəti ilə yaxınlaşıb.

İndiki məqamda separatçıların hansısa, aktivliyinin Ermənistan Azərbaycan arasındakı gələcək sülh müqaviləsinə, münasibətlərin normallaşma prosesinə təsiri ola bilərmi? Digər tərəfdən, son zamanlar Qarabağın yenidən sülh müqaviləsinə daxil edilməsi ilə bağlı çağırışlar artmağa başlayıb. Bir çox erməni siyasətçiləri və politoloqları hesab edirlər ki, Qarabağ problemi öz həllini tapmayıb. Bu çağırışlar sülh səylərinə necə təsir edir? Paşinyan höküməti bu və ya digər şəkildə bu çağırışların təsiri altına düşə bilər?

Mövzunu Poliqon-un əməkdaşı Sosial Tədqiqatlar Mərkəzinin (STM) sektor müdiri, politoloq İlyas Hüseynov ilə müzakirə edib.

İlyas Hüseynov: “Belə erməni siyasətçilərinin fikirlərini Ermənistan hakimiyyəti nəzərə almamalıdır”.

Bizim uzun müddət ərzində Paşinyanın bu cür manevrlərini gördüyümüzü xatırladan politoloq Poliqon-a açıqlamasında bildirib ki, daxili auditoriyada revanşist istəkləri rəhbər tutaraq bunu danışıqlar masasına yatırır və bundan istifadə edir, vaxtı uzadırdı:

“Qeyd etmək lazımdır ki, Qarabağ mövzusu Azərbaycan və Ermənistan arasında keçirilən danışıqlardan kənarlaşdırılıb. Bu da təbiidir. Çünki könüllü surətdə Qarabağı tərk edən şəxslərin təhlükəsizliyi və hüquqları haqqında danışmaq da doğru olmaz. Bəli, Azərbaycan reinteqrasiyada maraqlıdır və reinteqrasiya ilə bağlı planlarımız var. Bu planlar, infrastruktur layihələrin həlli ilə bağlı müraciətlər, çağırışlar uzun müddətdir ki, irəli sürülür. Lakin hazırkı gündəlikdə olan məsələ tamamilə fərqlidir. Sülh müqaviləsinin mətni ilə bağlı müzakirələrdə Qarabağ ermənilərinin hüquqları, təhlükəsizliyi haqqında məsələlərin daxil edilməsi də doğru olmaz.

Eyni zamanda biz görürük ki, Qarabağdakı separatçıların son lideri Samvel Şahramanyan və keçmiş Təhlükəsizlik Şurasının sədri Samvel Babayanın sülhə zidd və sülhlə uyğunluq təşkil etməyən açıqlamaları görünməkdədir. Babayan daha çox radikal formada çıxış edir. Şahramanyan məhz Qarabağ erməniləri haqqında nələrsə deyir.

İlyas Hüseynov: “Sülh müqaviləsi ilə bağlı konkret müzakirələr gedir və ikitərəfli danışıqlarda nəticələr də göz qabağındadır”.

Düşünürəm ki, belə erməni siyasətçilərinin fikirlərini Ermənistan hakimiyyəti nəzərə almamalıdır. Çünki Ermənistan hakimiyyəti bu yolla gedərsə, daha çətin durum yaran bilər və sülhə əngəl formalaşa bilər. Əlbəttə, Ermənistanın siyasi rəhbərliyi bu seperatçı düşüncədə, revanşizmin iddiasında olan fikirləri əlində rəhbər tutarsa, bu Ermənistanın siyası rəhbərliyinin sülhdən maraqlı olmadığını göstərəcək.

Biz uzun müddət ərzində Paşinyanın bu cür manevrlərini görmüşük. Yəni daxili auditoriyada revanşist istəkləri rəhbər tutaraq bunu danışıqlar masasına yatırır və bundan istifadə edir, vaxtı uzadırdı. Amma bu gün vaxtı uzatmaq vaxtı deyil. Praktiki fəaliyyət önəmlidir. Sülh müqaviləsi ilə bağlı konkret müzakirələr gedir və ikitərəfli danışıqlarda nəticələr də göz qabağındadır”.

Nərminə UMUDLU
Poliqon.info