CNN: İsrail HƏMAS-la müharibə planlarını dəyişir

Poliqon xəbər verir ki, Amerikanın CNN telekanalına müsahibə verən ekspertlər bu qənaətə gəliblər.

Britaniya Kral Beynəlxalq Münasibətlər İnstitutunun Yaxın Şərq və Şimali Afrika üzrə əməkdaşı Bilal Y. Saab İsrailin Fələstinin HƏMAS hərəkatını tamamilə məhv etmək niyyətini əlçatmaz məqsəd adlandırıb.

“IDF rəhbərliyi çox yaxşı başa düşür ki, onların edə biləcəyi əsas şey HƏMAS-ın hərbi imkanlarını ciddi şəkildə zəiflətməkdir”, deyə Saab bildirib.

Ekspert sözlərinə görə, İsrailin artan beynəlxalq hiddət fonunda nə qədər müharibə apara biləcəyi bəlli deyil. Buna görə də Saab hesab edir ki, İsrailin HƏMAS-ın inzibati “zirvəsini” məhv etmək niyyəti nəzərəçarpacaq nəticə verməyəcək, çünki “belə təşkilatlar liderləri asanlıqla əvəz edə bilirlər.

İsrail Demokratiya İnstitutunun rəhbəri və Knessetin Kadima partiyasından keçmiş üzvü Yohanan Plesner isə hesab edir ki, HƏMAS əsirliyində qalan israilli girovların yaxınları İsrailin Baş naziri Benyamin Netanyahuya güclü siyasi təzyiq göstərirlər. İsrailin Baş nazirinin ölkədəki reytinqi Qəzza zolağında müharibə başlayandan bəri xeyli aşağı düşüb.

Qeyd edək ki, İsrail və Fələstinin HƏMAS hərəkatı arasında müharibə 7 oktyabr 2023-cü ildə başlayıb. İsrailin Baş naziri Benyamin Netanyahu bildirib ki, Fələstin hərəkatı tamamilə məhv edilənə qədər müharibə davam edəcək.

Qəzza zolağında gedən döyüşlər nəticəsində 22,2 min nəfər həlak olub. 100-dən çox insan HƏMAS hərəkatının girovu olaraq qalır.

Poliqon.info