ABŞ tərəfdaşları ilə İsrail və Fələstinin HƏMAS hərəkatı arasında Qəzza zolağında döyüşlərə altı həftəlik fasilə verilməsini nəzərdə tutan razılaşma üzərində işləyir...
Poliqon xəbər verir ki, bu barədə ABŞ prezidenti Co Bayden İordaniya kralı II Abdullah ilə birgə keçirdiyi mətbuat konfransında bildirib.
“ABŞ İsrail və HƏMAS arasında girov məsələsi ilə bağlı ən azı altı həftəlik döyüşlərə fasilə verilməsini nəzərdə tutan razılaşma üzərində işləyir. Bu vaxtdan daha uzun müddət nələrisə inkişaf etdirmək üçün istifadə edə bilərik”, deyə Bayden Ağ Evin saytında yayımlanan mətbuat konfransında bildirib.
Co Bayden bir daha vurğulayıb ki, İsrail Qəzza zolağının cənubundakı Rəfah şəhərində orada yaşayan fələstinli mülki şəxslərin təhlükəsizliyini təmin etmək planı olmadan hərbi əməliyyat keçirməməlidir. Qeyd edək ki, ABŞ prezidenti eyni fikri bir gün əvvəl, fevralın 12-də İsrailin Baş naziri Benyamin Netanyahu ilə telefon danışığı zamanı səsləndirib.
Poliqon.info