Qaz kəmərinin tikintisinə icazələrin verilməsinə cavabdeh olan idarənin əməkdaşları 2018-ci ildə öz saytında gizli sənəd dərc ediblər...
Poliqon xəbər verir ki, bu barədə “Bild” nəşri məlumat yayıb. Nəşrin məlumatına görə, Almaniya Federal Prokurorluğu “Ştralsund” Mədən Departamentinin “Şimal axını 2” qaz kəmərinin tikintisi zamanı dövlət sirrinin açıqlanmasına görə məsuliyyət daşıyan əməkdaşlarına qarşı istintaqa başlayıb.
Nəşrin məlumatına görə, qaz kəmərinin tikintisinə icazələrin verilməsinə cavabdeh olan idarənin əməkdaşları 2018-ci ildə öz internet saytında NATO sualtı qayıqlarının və onların silahlarının fəaliyyət zonaları haqqında məlumatı əks etdirən sənəd dərc ediblər.
Bu məlumat “gizli, yalnız rəsmi istifadə üçün” qeyd olunub. “Bild” nəşri qeyd edir ki, dövlət sirrini yaydıqlarına görə idarənin əməkdaşlarını 5 ilə qədər həbs gözləyir.
Öz növbəsində, “Bild”in köşə yazarı Nikolas Harbuş qeyd edib ki, bu məlumat Şimal axınında partlayışların təşkilatçıları üçün “maraqlı ola bilər”.
Xatırladaq ki, “Şimal axını”nda partlayışlar 2022-ci il sentyabrın 26-na keçən gecə Baltik dənizinin Danimarkanın Bornholm adası yaxınlığındakı hissəsində baş verib. Partlayışlar nəticəsində dörd qaz kəmərindən üçü zədələnib.
Poliqon.info