Aleksandr Nevzorov
Məşhur Rusiya jurnalisti və televiziya aparıcısı
Son 20 ildə Rusiya raketlər, tanklar, bombalar, yürüşlər, təbliğat və öz hərbi gücü ilə öyünməkdən savayı HEÇ NƏ İLƏ məşğul olmayıb. "Stalin ordusuna pərəstiş" yetişib və förmalaşıb. Beyinlərə durmadan "zireh", "xəncər", "səsdən iti silah" və bu kimi anlayışlar pərçim edilib. Paradların gurultusundan qulaqlarımız batıb.
Ölkədə hər şey müharibəyə və onun aksessuarlarına işləyib. Yerdə qalanlara, həyati əhəmiyyət daşıyanlara "yollar tıxanıb". Adama elə gəlirdi ki, Rusiyanın bətnində elə bir hərbi maşın "yetişir" ki, bir- iki saata istənilən ölkəni və istənilən ordunu məhv etməyə qadir olacaq.
Belə təəssürat yaranıb ki, Rusiya qorxulu və ölümsaçan "div"dir. Sanki "analoqu olmayan" adında qədim iblisin özüdür ki, var. "Və tayqadan başlanan və Britaniya dənizlərinədək uzanan məkanda Putin ordusu hamıdan güclüdür".
Maraqlıdır ki, bu nağıla hamı inanırdı. Makronlar, merkellər və NATO əsməyə başladılar. Mütləq qabiliyyət Lavrovun xamlığı və bütün Rusiya DİN-i tərəfindən izhar edilirdi. Belə təəssürat yaratmaq mümkün oldu ki, heç demə dünya, əslində, Rusiyanın və onun rejiminin iltifatı və ABŞ, Almaniya, İtaliyaya və s. qarşı dözümlü yanaşması səbəbindən mövcuddur.
Lakin həqiqət anı yetişdi.
Puldan və silahdan "partlayan" bu div demək olar ki, silahsız, yoxsul, kiçik Ukrayna ilə əlbəyaxa oldu.
Bəli, NATO "xeyriyyəçiləri" Ukraynaya nəsə "xırda-xuruş" şeylər ötürürdü, amma bunlar onun bütün "döyüş gücünün" 1-2 faizi demək idi, silahlarının 98 faizi isə hələ sovetlərdən qalma köhnəlmiş, yüz dəfə lehimlənən, üçyüz dəfə rənglənən və mahiyyətcə bu gün gülüş doğuran zir-zibilə bənzəyir. Əlbəyaxa döyüşün taleyi bir-iki saata həll olunmalıydı.
Və birdən inanılmaz mənzərənin şahidi olduq.
Cəhənnəmi xatırladan "səma boyda" div, heç demə, qəddar cırtdan sehrbazmış. Sehr sovruldu. İmperiya adlanan nəsnə saxta çıxdı. Zəfər baş vermədi.
Hazırda Putin ordusu böyük itkilər verərək bir şəhərcikdən digərinə sürünə- sürünə qalıb, hər yerdə cəsur ukraynalıların əlindən qaçmağa məcburdur.
Mənin gördüklərim birinci çeçen savaşındakı Rusiya ordusundan heç nə ilə fərqlənmir. Həmin yarıtmaz komandanlıq, həmin xaos, həmin burnufırtıqlı çağırışçılardır. Və mənasız, nəticəsiz bombalamağa olan həmin ehtirasdır.
Birinci çeçen savaşının nə ilə bitdiyi yadınızdadır.
Ümumiyyətlə, hesab edək ki, Rusiyanın bəxti yaman gətirib ki, onun rəqibi, məsələn, Azərbaycan yox, Ukraynadır. Mən hələ Türkiyə kimi nəhəngdən danışmıram.
P.S. Mən yalnız soyuqqanlı siyasi diaqnoz qoydum. Xoşunuz gəlmirsə, başqa həkimə gedin.
pia.az
Digərxəbərlər
Populyar xəbərlər
