Ukrayna 2030-cu ilə qədər Aİ-yə üzv ola bilər

Avropa Şurasının prezidenti Şarl Mişel bildirib ki, Ukrayna 2030-cu ilə qədər Avropa İttifaqına (Aİ) üzv ola bilər. Onun sözlərinə görə, Kiyevin Aİ-yə qoşulması üçün Ukrayna hakimiyyəti və blokun rəhbərliyi “ev tapşırıqlarını yerinə yetirməli” olacaq.

Poliqon xəbər verir ki, Şarl Mişel bunu Almaniyanın “Der Spiegel” nəşrinə müsahibəsində bildirib.

“Bəli. Hər iki tərəf öz tapşırıqlarını yerinə yetirsə, Ukrayna həqiqətən də 2030-cu ildə Aİ-nin üzvü ola bilər”, deyə Mişel müsahibəsində qeyd edib.

Eyni zamanda, Avropa Şurasının rəhbəri vurğulayıb ki, Ukrayna və Aİ-yə üzv olmaq üçün digər namizəd ölkələr fəal və davamlı islahatlar aparmalı, korrupsiyaya qarşı mübarizə aparmalı və hüquqi şərtlərə əməl etməlidir.

“Avropa İttifaqında biz birlikdə nəyə nail olmaq istədiyimizi, prioritetlərimizin nədən ibarət olduğunu və həmçinin nəyə pul xərcləmək istədiyimizi aydın şəkildə başa düşməliyik”, deyə Şarl Mişel vurğulayıb. Lakin o, Ukraynanın bu gün Avropa Birliyinə üzv olmağa nə dərəcədə hazır olduğunu qiymətləndirməkdən imtina edib.

Poliqon.info