Azərbaycan və Ermənistan parlamentlərinin sədrləri mayın 16-da Cenevrədə görüşəcəklər...
Politoloq: “Azərbaycanla Ermənistan arasında dialoq müxtəlif səviyyələrdə intensivləşib”.
“Görüşlərin intensivləşməsinin başqa bir əhəmiyyəti də var, ortam yumşalır, tərəflər bir-birlərinə qarşı sərt ritorikadan çəkinməyə başlayıblar”.
Bu sözləri politoloq Elxan Şahinoğlu Azərbaycan və Ermənistan parlamentlərinin sədrlərinin növbəti görüşünü Poliqon-a şərh edərkən qeyd edib.
Xəbər verdiyimiz kimi, Azərbaycan və Ermənistan parlamentlərinin sədrləri Sahibə Qafarova və Alen Simonyan mayın 16-da Cenevrədə görüşəcəklər.Bu barədə Ermənistan KİV-ləri məlumat yayıb. Bildirilib ki, Ermənistan nümayəndə heyəti mayın 15-18-də Parlament sədrlərinin VI Ümumdünya Konfransının hazırlıq komitəsinin iclasında iştirak etmək üçün orada olacaq.
Azərbaycan və Ermənistan arasında parlament əlaqələrinin güclənməsi iki ölkə xalqlarının yaxınlaşmasına bu və ya digər şəkildə töhfə verə bilərmi?
Azərbaycan və Ermənistan arasındakı baş tutan görüşləri Poliqon-un əməkdaşı politoloq Elxan Şahinoğlu ilə müzakirə edib.
Elxan Şahinoğlu: “Bu görüşlər sülh və çərçivə sazişinin imzalanması tarixini yaxınlaşdırır”.
Qarşımızda Türkiyə-Yunanıstan münasibətlərinin örnəyinin olduğunu vurğulayan politoloq Poliqon-a bildirib ki, iki ölkə arasında mübahisə yaradan mövzulara baxmayaraq, Ankara ilə Atina mübahisələri dərinləşdirmək və bununla qarşıdurmanı gücləndirmək əvəzinə ortaq nöqtələr tapmağa imkan verən siyasətə üstünlük verməyə başlayıblar:
“Azərbaycanla Ermənistan arasında dialoq müxtəlif səviyyələrdə intensivləşib. İki ölkənin lideri prezident İlham Əliyevlə baş nazir Nikol Paşinyan arasında, o cümlədən xarici işlər nazirləri Ceyhun Bayramovla Ararat Mirzoyanla yanaşı parlament sədrlərinin görüşləri də artmaqdadır. Azərbaycan və Ermənistan parlamentlərinin sədrləri Sahibə Qafarova ilə Alen Simonyan arasında növbəti görüşü Cenevrədə gerçəkləşəcək. Bundan əvvəl parlament sədrləri martın 22-də eyni şəhərdə görüşmüşdülər.
Bu görüşlər sülh və çərçivə sazişinin imzalanması tarixini yaxınlaşdırır. Görüşlərin intensivləşməsinin başqa bir əhəmiyyəti də var, ortam yumşalır, tərəflər bir-birlərinə qarşı sərt ritorikadan çəkinməyə başlayıblar.
Qarşımızda Türkiyə-Yunanıstan münasibətləri örnəyi var. İki ölkə arasında mübahisə yaradan mövzulara baxmayaraq, Ankara ilə Atina mübahisələri dərinləşdirmək və bununla qarşıdurmanı gücləndirmək əvəzinə ortaq nöqtələr tapmağa imkan verən siyasətə üstünlük verməyə başlayıblar”.
Nərminə UMUDLU
Poliqon.info
Digərxəbərlər
Populyar xəbərlər
