Polşa Xarici İşlər Nazirliyi martın 15-dən 17-dək keçirilən Rusiya prezident seçkilərinin qanuni, demokratik və ədalətli olmadığını bildirib...
Poliqon xəbər verir ki, Britaniyanın xarici işlər naziri Devid Kemeron səsvermənin keçirildiyi şərtlərin beynəlxalq standartlara uyğun olmadığını bildirib.
Polşa Xarici İşlər Nazirliyinin bəyanatında deyilir ki, Varşava Rusiyanın yeni bölgələrində seçkilərin nəticələrini tanımır. Xarici İşlər Nazirliyinin məlumatına görə, bütün ölkə üzrə səsvermə “repressiv qanunvericilik”, “müharibə əleyhinə fikir bildirən namizədlərin seçkilərdə iştirakına qadağa qoyulması” və “siyasi motivli cinayət mühakimələri” şəraitində keçib.
Ötən gün Almaniya Xarici İşlər Nazirliyi də Rusiyada keçirilən seçkiləri tənqid edib. Nazirlik bəyan edib ki, Rusiyada keçirilən “psevdoseçkilər” azad deyil və “onların nəticəsi heç kəsi təəccübləndirmir”. Rusiya Xarici İşlər Nazirliyinin sözçüsü Mariya Zaxarova buna belə cavab verib: “Almaniya Xarici İşlər Nazirliyinin şərhində razılaşa biləcəyim yeganə şey odur ki, Rusiyada səsvermənin nəticələrində təəccüblü heç nə yoxdur”.
Mərkəzi Seçki Komissiyasının ilkin məlumatlarına görə, protokolların 93,06%-i işləndikdən sonra Vladimir Putin (öz namizədliyini irəli sürmüş) 87,26%, Nikolay Xaritonov (Rusiya Kommunist Partiyası) 4,29%, Vladislav Davankov (Yeni insanlar) 3,89%, Leonid Slutski (LDPR) 3,16% səs toplayıb. Son məlumatlara görə, seçici fəallığı 74,22 faiz təşkil edib.
Poliqon.info