Dağıstanda baş verən terror aktlarından sonra Kadırov Çeçenistan təhlükəsizlik qüvvələrini “vəhhabilik”də şübhəli bilinən şəxslərin yaxınlarını öldürməyə çağırıb...
Poliqon Meduza nəşrinə istinadən xəbər verir ki, Çeçenistan rəhbəri Ramzan Kadırov respublikanın təhlükəsizlik və hüquq-mühafizə orqanlarının nümayəndələri ilə görüşündə “vəhhabilik”də şübhəli bilinən çeçenlərin qohumlarını öldürməklə hədələyib.
İyunun 25-də baş tutan görüşdən video həmin gün Kadırovun Telegram kanalında yayımlanıb. Çeçenistan başçısının bəyanatları “Qafqaz. Reallıqları” nəşrinin diqqətini cəlb edib.
“Əgər şübhəli şeytanlarla əlaqədədirsə, onun bütün ailəsi cəzalandırılmalıdır. Bu ailə bilməlidir ki, bütün məsuliyyət onların üzərinə düşür. Kim öz qardaşına əl qaldırsa, başa düşməlidir ki, qan davası ilə hamını öldürəcəyik - ata, qardaş, əmi, hamını... Çeçen xalqına müraciət edirəm, - övladlarınızın nə olduğunu nəylə məşğul olduğunu bilin. Vəhhabiliyin əlamətlərini hamınız bilirsiniz, görsəniz dərhal yerli polisə məlumat verin. Səni də, oğlunu da, qardaşını da sonradan öldürməkdənsə, vahabilərin qarşısını vaxtında alsaq, daha yaxşı olar” deyə Kadırov toplantıda deyib.
Öz növbəsində, Çeçenistanın “Seqodnya” dövlət agentliyi bildirib ki, Kadırov hüquq-mühafizə orqanının əməkdaşını öldürməyə cəhd edən şəxsin qohumlarını “qanun çərçivəsində tam şəkildə” cəzalandırmaqla hədələyib.
Videodan sonra Çeçenistan rəhbərinin teleqramında dərc olunmuş yazıda bildirilir ki, görüşdə digər məsələlərlə yanaşı, “terror cinayətlərinin qarşısının alınması üzrə işin gücləndirilməsi məsələləri” müzakirə edilib, Kadırov isə Dağıstandakı terror aktları ilə bağlı çağırış edib.
Poliqon.info