Gürcüstan prezidenti Salome Zurabişvili özünün və tərəfdarlarının iddia etdiyi kimi eks-prezident Mixail Saakaşvilinin zəhərlənməsinə və işgəncələrə məruz qalmasına inanmır...
Poliqon xəbər verir ki, bu barədə Zurabişvili Böyük Britaniyaya səfəri zamanı BBC-yə müsahibəsində bildirib.
“Mən buna inanmıram. Onun həbsxanada öləcəyini də düşünmürəm”, deyə Zurabişvili aparıcının sabiq prezident Saakaşvilinin zəhərlənməsi və işgəncələrə məruz qalması ilə bağlı xəbərlərə inanıb-inanmaması ilə bağlı sualına cavab verib.
Eyni zamanda, Zurabişvili Saakaşvilinin həbsdə ölməsinə imkan verməyəcəyini vurğulayıb. Gürcüstan prezidentinin sözlərinə görə, bunun baş verməməsi üçün hər gün aidiyyatı qurumlarla əlaqə saxlayır.
Eks-prezidentin əfv olunmasından danışan Zurabişvili qeyd edib ki, bu məsələ açıq qalır. Onun sözlərinə görə, Saakaşvilini həbsdən azad etməyin başqa yolları var, məsələn, o, ekstradisiya oluna bilər.
Zurabişvili keçmiş dövlət başçısının başqa ölkəyə aparılmasının mümkünlüyü barədə suala, “Bu baş verə bilər”, deyə cavab verib.
Xatırladaq ki, Mixail Saakaşvili 2013-cü ildə Gürcüstanı tərk edib, bundan sonra ölkədə ona qarşı 4 cinayət işi açılıb, onlardan ikisində siyasətçi qiyabi olaraq üç və altı il müddətinə azadlıqdan məhrum edilib. 2021-ci ilin oktyabrında Saakaşvili gizli şəkildə Gürcüstana gəlib və həbs edilib. 2022-ci ilin mayında səhhəti pisləşdiyi üçün o, Tbilisinin özəl “Vivamed” klinikasına aparılıb və bu günə kimi oradadır.
Saakaşvilinin özü, eləcə də vəkilləri və ailə üzvləri onun ağır metallardan zəhərləndiyini, eləcə də həbsdə olduğu iddia edilən işgəncələri dəfələrlə bəyan ediblər.
Gürcüstan hakimiyyətinin mövqeyi ondan ibarətdir ki, o, səhhətinin ağır olduğunu iddia edib və azadlığa çıxmaq üçün qəsdən lazımi miqdarda qida qəbul etməyib.
2023-cü il fevralın 6-da Tbilisi Şəhər Məhkəməsi sabiq prezidentin vəkillərinin səhhəti ilə bağlı onun azadlığa buraxılması ilə bağlı vəsatətini rədd edib. May ayında Avropa İnsan Haqları Məhkəməsi də Saakaşvilinin vəkillərinin müalicə üçün Varşavaya göndərilməsi tələbini rədd edib.
Poliqon.info