ABŞ BMT Təhlükəsizlik Şurasında KXDR-dən Rusiyaya silah ötürülməsi məsələsini qaldıracaq

Poliqon xəbər verir ki, bu barədə ABŞ Milli Təhlükəsizlik Şurasının strateji kommunikasiyalar üzrə koordinatoru Con Kirbi brifinq zamanı bildirib.

“Biz Rusiya ilə KXDR arasında hərbi-texniki əməkdaşlığın Avropa, Koreya yarımadası, Hind-Sakit okean regionu və bütün dünya üçün təhlükəsizliklə bağlı təsirlərindən dərin narahatıq. KXDR-dən Rusiyaya ballistik raketlərin verilməsi birbaşa BMT Təhlükəsizlik Şurasının çoxsaylı qətnamələrini pozur. Sabah müttəfiqlərimiz və tərəfdaşlarımızla birlikdə bu hərbi təchizatla bağlı məsələni BMT Təhlükəsizlik Şurasında qaldıracağıq və Rusiyadan beynəlxalq öhdəliklərinin növbəti dəfə pozulmasına görə məsuliyyət daşımasını tələb edəcəyik”, deyə Kirbi brifinqdə vurğulayıb.

Ağ Ev rəsmisi həmçinin qeyd edib ki, Birləşmiş Ştatlar Rusiya və Şimali Koreya arasında hərbi-texniki əməkdaşlığı təşviq edən şəxslərə və şirkətlərə qarşı “bütün mümkün sanksiyaları” tətbiq etmək niyyətindədir.

Qeyd edək ki, Rusiya Xarici İşlər Nazirliyi bundan əvvəl Şimali Koreyanın Rusiyaya hərbi tədarükü ilə bağlı bəyanatları əsassız adlandırıb. Nazirliyin rəsmi nümayəndəsi Mariya Zaxarova bildirib ki, Rusiya BMT Təhlükəsizlik Şurasının KXDR ilə qarşılıqlı fəaliyyətlə bağlı qətnaməsində göstərilən bütün tələbləri yerinə yetirir.

Poliqon.info