Yaxın Şərqdə atəşkəslə bağlı son vəziyyət necədir?

Poliqon xəbər verir ki, bu barədə Amerikanın The New York Times qəzeti diplomatik dairələrdəki mənbələrə istinadən məlumat yayıb.

Qəzzada sülhün əldə edilməsi indi mümkün görünmür, çünki hər iki tərəf, İsrail və HƏMAS qeyri-mümkün şərtlər irəli sürürlər.

NYT qeyd edir ki, hərbi əməliyyatların uzanması münaqişənin bütün Yaxın Şərq regionuna yayıla biləcəyi qorxusunu artırır.

Ötən gün Fransa prezidenti Emmanuel Makron İsrailin baş naziri Benyamin Netanyahu ilə telefon danışığında onu Qəzza zolağında hərbi əməliyyatlar zamanı mülki itkilərin sayını azaltmaq üçün tədbirlər görməyə çağırıb, həmçinin onunla HƏMAS hərəkatına qarşı məhdudiyyətlər tətbiq etmək üçün Avropa İttifaqının hərəkətlərini müzakirə edib.

Ötən günlərdə yayılan məlumatlara görə, Misir, Qətər, ABŞ, İsrail, Fələstin rəhbərliyi və HƏMAS-ın siyasi qanadı arasında müxtəlif formatlarda atəşkəs danışıqları aparıldığı barədə xəbərlər yayılsa da, hələlik heç bir rəsmi açıqlama yoxdur. Bu arada Fələstin prezidenti Mahmud Abbas deyib ki, onların Qəzzada məsuliyyəti öz üzərinə götürməsi üçün hücumlar tamamilə dayandırılmalı, humanitar yardımlar çatdırılmalı və fələstinlilərin deportasiyasının qarşısı alınmalıdır.

Poliqon.info