Ərdoğan İlham Əliyevlə görüşmək üçün niyə məhz Naxçıvana gəlir?

Politoloq: “Sayın Ərdoğan bununla göstərmək istəyir ki, Azərbaycanın Qərb vilayəti ilə Naxçıvan ərazisindəki əlaqəni təmin edilməsi yüksək əhəmiyyətə malikdir. Buna görə də, nəyin hesabına olur-olsun biz bunu təmin edəcəyik”.

“Naxçıvanın ən simvolik tərəfi oranın Türkiyə üçün də əhəmiyyətli olan haqqını göstərməkdir. Bu səbəbdən də “Zəngəzur dəhlizi”nin açılmasının vacibliyi bir daha vurğulanır”.

Bu sözləri politoloq Qabil Hüseynli Türkiyə prezidentinin Naxçıvan səfərini Poliqon-a şərh edərkən qeyd edib.

Xəbər verdiyimiz kimi Türkiyə Prezidenti Rəcəb Tayyib Ərdoğan bu gün Naxçıvana gəlir. O, Azərbaycan dövlət başçısı İlham Əliyevlə görüşəcək. Məlumata görə, liderlər sentyabrın 19- da keçirilmiş anti-terror tədbirlərinin nəticəsini müzakirə edəcək və Zəngəzur dəhlizi barədə danışacaqlar.

Bəs Ərdoğan İlham Əliyevlə görüşmək üçün niyə məhz Naxçıvana gəlir və verilən mesaj nədən ibarətdir?

Ərdoğanın Naxçıvan səfərində verəcəyi mesajları Poliqon-un əməkdaşı politoloq Qabil Hüseynli ilə müzakirə edib.

Qabil Hüseynli: “Bu səfərlə Rəcəb Tayyib Ərdoğan Naxçıvan üçün bəzən sarsaq fikirlər söyləyən erməni dairələrinə də cavab vermiş olur”.

Vasif Talıbovun dövründə Naxçıvanın həm Azərbaycanda, həm də Türkiyədə çox böyük sarsıntıya səbəb olduğunu vurğulayan politoloq Poliqon- açıqlamasında qeyd edib ki, indi Türkiyə prezidentinin Naxçıvana gəlməsi ilə mesajın ünvanının bu diyarın bütün türklər üçün müqəddəs yer və müqəddəs torpaq olmasıdır:

“Mənim zənnimcə, Türkiyə prezidentinin Naxçıvana gəlməsi 1923-cü ilin 5 mayında imzalanmış Qars müqaviləsi ilə bağlıdır. Bu Türkiyənin Naxçıvan üçün zəmanətçi ölkə olduğunu bir növ göz önünə sərir. Eyni zamanda bu səfərlə Rəcəb Tayyib Ərdoğan Naxçıvan üçün bəzən sarsaq fikirlər söyləyən erməni dairələrinə də cavab vermiş olur.

Üstəlik də, açığın demək lazımdır ki, Vasif Talıbovun dövründə Naxçıvan həm Azərbaycanda, həm də Türkiyədə çox böyük sarsıntıya səbəb olub. İndi Türkiyə prezidentinin Naxçıvana gəlməsi ilə mesajın ünvanı odur ki, bu diyarın bütün türklər üçün müqəddəs yer və müqəddəs torpaqdır. Bu torpağa bizim də mənəvi haqqımız çatır. Naxçıvanda hər hansı qanundan kənar halların baş verməsi əlbəttə ki, qəbuledilməzdir.

Qeyd edim ki, Naxçıvanın ən simvolik tərəfi oranın Türkiyə üçün də əhəmiyyətli olan haqqını göstərməkdir. Bu səbəbdən də Zəngəzur dəhlizinin açılmasının vacibliyi bir daha vurğulanır. Çünki sayın Ərdoğan bununla göstərmək istəyir ki, Azərbaycanın Qərb vilayəti ilə Naxçıvan ərazisindəki əlaqəni təmin edilməsi yüksək əhəmiyyətə malikdir. Buna görə də, nəyin hesabına olur-olsun biz bunu təmin edəcəyik”.

Nərminə UMUDLU
Poliqon.info