İran parlamenti İslami geyim qaydalarını pozmağa görə 10 ilə qədər həbs və cərimə nəzərdə tutan “Hicab və iffət haqqında” qanun layihəsini qəbul edib...
Poliqon xəbər verir ki, bu barədə BBC məlumat yayıb.
Qanun layihəsinin lehinə 152, əleyhinə 34 deputat səs verib, 7 deputat bitərəf qalıb. İndi qanunu Qəyyumlar Şurası - konstitusiya nəzarəti orqanı təsdiq etməlidir, bundan sonra tam hüquqlu qanuna çevriləcək.
Sənəd təsdiq olunarsa, qanunu pozduqlarına görə qadınlar 5 ildən 10 ilədək müddətə azadlıqdan məhrumetmə və 3651-7302 dollar məbləğində cərimə ilə cəzalandırılacaq.
Qanun layihəsində həmçinin KİV-də və sosial şəbəkələrdə “çılpaqlığı təbliğ edən” və ya “hicaba istehza edən” şəxslərin, habelə qadın sürücü və ya sərnişinin hicabsız və ya uyğun geyimdə olmadığı nəqliyyat vasitələrinin sahiblərinin cərimələnməsi nəzərdə tutulur.
“Mütəşəkkil şəkildə” və ya “xarici və ya düşmən dövlətlər, kütləvi informasiya vasitələri, qruplar və ya təşkilatlarla əməkdaşlıq edərək” geyim tərzinin pozulmasına yardım edən hər bir şəxs 5 ildən 10 ilədək müddətə azadlıqdan məhrum edilə bilər.
Səlahiyyətlilər qadınları və qızları İslami geyim tərzinə qayıtmağa məcbur etmək üçün 10 illik həbs müddəti perspektivinə ümid edir. "Hicab və iffət haqqında" qanunun ilkin olaraq üç il müddətində qüvvədə olacağı gözlənilir və onun effektivliyindən asılı olaraq, daimi əsasda tətbiq oluna bilər.
İran qanunlarına görə, bu gün həddi-büluğa çatmış qadınlar və qızlar saçlarını hicabla örtməli, bədənlərini gizlətmək üçün uzun, boş paltarlar geyinməlidirlər. Qadınlara uyğun olmayan görünüşə görə cərimələr kəsilir. Həmçinin, qadınlar polis tərəfindən saxlanıla bilər.
Poliqon.info