İranın müdafiə naziri Ermənistanla Azərbaycan arasında yaxın gələcəkdə müharibə ehtimalını istisna edib...
İran Xarici İşlər Nazirliyi bildirib ki, Tehran Cənubi Qafqazdakı vəziyyəti diqqətlə izləyir və Ermənistan və Azərbaycanla əlaqə saxlayır.
Poliqon xəbər verir ki, İranın müdafiə naziri, briqada generalı Məhəmməd Rza Aştiani Azərbaycanla Ermənistan arasında gərginliyin artması fonunda Cənubi Qafqazda müharibənin başlanması ehtimalını istisna edib. İranın “Tasnim” Agentliyinin məlumatına görə, o, bu barədə çərşənbə günü keçirdiyi brifinqdə bildirib.
“Biz regionda müharibənin başlamayacağına inanırıq”, deyə Məhəmməd Rza Aştiani vurğulayıb.
Eyni zamanda müdafiə naziri İranın regionda heç bir sərhəd dəyişikliyinə razılıq verməyəcəyini də vurğulayıb. Generalın fikrincə, indiki proseslər “konkret heç bir hadisənin baş verməyəcəyini” göstərir.
Qeyd edək ki, daha əvvəl İran Xarici İşlər Nazirliyinin sözçüsü Nasser Kənani bildirib ki, Tehran Cənubi Qafqazdakı vəziyyəti diqqətlə izləyir və sülh və təhlükəsizliyin təmin edilməsi üçün Ermənistan və Azərbaycanla əlaqə saxlayır. O, Azərbaycan qoşunlarının son yerləşdirməsini “dağlarda hərəkətin çətinləşə biləcəyi qış dövrünə rutin hazırlıq” kimi qiymətləndirib.
Poliqon.info