Bolqarıstan ilk dəfə olaraq Ukraynaya açıq şəkildə hərbi yardım göndərir

Poliqon xəbər verir ki, bu barədə Bolqarıstanın "Euractiv" portalı məlumat yayıb. Portal yazır ki, bu, Rusiya ilə Ukrayna arasında münaqişə başlayandan bəri Bolqarıstanın açıq şəkildə göndərdiyi ilk hərbi yardımdır.

“Biz dəyişməyə davam edirik - Demokratik Bolqarıstan”, deyə hakim koalisiyasından olan deputat İvaylo Mirçev texnikanın göndərildiyini açıqlayıb.

"Bu, Dirçəliş Prosesi (Bolqarlaşdırma) zamanı alınmış zirehli hərbi texnikadır və heç vaxt istifadə olunmayıb. Eyni zamanda, bunlar saxlama və texniki xidmət xərcləri tələb edir”, deyə İvaylo Mirçev bildirib.

"Bolqarlaşdırma" 1980-ci illərdə sosialist Bolqarıstan hökuməti tərəfindən həyata keçirilən məcburi assimilyasiya siyasətidir. Bu, ölkənin müsəlman azlığına qarşı bir sıra repressiv assimilyasiya kampaniyalarının kulminasiya nöqtəsi idi.

Hərbi yardım Ukrayna prezidenti Volodimir Zelenskinin Bolqarıstana səfərindən bir həftə sonra elan edilib. Bolqarıstan prezidenti Rumen Radev onunla danışıqlar zamanı ölkənin müdafiə qabiliyyətindən qorxduğu üçün Bolqarıstan ordusunun ehtiyatlarından hərbi texnikanın köçürülməsindən imtina etmədiyini bildirib.

Mart ayında "Euractiv" mənbələrə istinadən yazıb ki, iki il ərzində Bolqarıstan üçüncü ölkələr vasitəsilə Ukraynaya 1 milyard dollardan çox silah göndərib. Bolqarıstanın İqtisadiyyat Nazirliyi bildirib ki, Rusiya qoşunlarının Ukrayna ərazisinə daxil olmasından sonra bu ölkədə heç bir şirkətə Ukraynaya silah ixracı üçün icazə verilməyib.

Poliqon.info