Son zamanlar Yerəvan Moskva münasibətlərinin gərginləşdiyi hiss olunur...
Politoloq: “Ermənistanla Rusiya arasında gərginlik gah qalxır, gah da enir”.
“Ermənilər bəzən ruslara qarşı şantaj elementlərdən istifadə edirlər, bəzən də yaltaqlanırlar”.
Bu sözləri politoloq Qabil Hüseynli Rusiya və Ermənistan münasibətlərini Poliqon-a şərh edərkən qeyd edib.
Bu günlərdə Rusiyanın İrəvandakı səfiri Sergey Kopırkin Ermənistan Xarici İşlər Nazirliyinə çağırılıb. Səfir Laçın yolunda baş verən son insidentə görə nazirliyə dəvət olunub. Ermənistan-Rusiya münasibətlərinin son zamanlarda gərginləşdiyi hiss olunur.
Bəs bu gərginlik süni şəkildə yaradıla bilərmi?
Mövzunu Poliqon-un əməkdaşı politoloq Qabil Hüseynli ilə müzakirə edib.
Qabil Hüseynli: “Rusiya və Ermənistan arasında gərginlik olanda, bu gərginliyin suni surətdə yaradıldığı zənn edilir”.
Bu iki xalq arasındakı münasibətlərin bəlkə də, dünyadı analoqu olmayan bir münasibətlər olduğunu qeyd edən politoloq Poliqon-a bildirib ki, buna görə də həmin münasibətlərə dəqiq diaqnoz qoymaq o qədər də asan bir məsələ deyil:
“Ermənistanla Rusiya arasında gərginlik gah qalxır, gah da enir. Bu iki ölkə arasındakı münasibətlər birdən-birə də çevrilib əməkdaşlıq forması alır. Yəni ikibaşlı oyunlar həm Rusiya tərəfindən, həm də Ermənistan tərəfindən həyata keçirilir. Buna görə də Rusiya və Ermənistanın münasibətlərində bəzən gərginlik olduğunu adam qəbul edə bilmir. Buna görə də Rusiya və Ermənistan arasında gərginlik olanda, bu gərginliyin suni surətdə yaradıldığı zənn edilir.
Əgər Ermənistanın baş naziri Nikol Paşinyan bir ayda 4 dəfə Rusiya prezidentinin qəbuluna gedirsə, iki ölkə arasında gərginlikdən söhbət gedə bilməz. Eyni zamanda da, liderlərin görüşündə hansı mövzuların müzakirə edildiyi təxmini edildiyində, bu zaman gərginlikdən yox, mehriban əməkdaşlıqdan, səmimi münasibətlərdən daha düzgün olardı.
Ermənilər ruslarla həmişə bu cür münasibətlərdə olub. Ermənilər bəzən ruslara qarşı şantaj elementlərdən istifadə ediblər, bəzən də yaltaqlanıblar. Ruslar da bu “ərköyün” uşaqlarının gah başını sığallayıblar, gah da yeri gələndə onlara təpiniblər. Bu iki xalq arasındakı münasibətlər bəlkə də, dünyadı analoqu olmayan bir münasibətlərdir. Buna görə də həmin münasibətlərə dəqiq diaqnoz qoymaq o qədər də asan bir məsələ deyil”.
Nərminə UMUDLU
Poliqon.info