Peskovun oğlu səfərbərlikdən imtina edib: “Başqa yolla həll edəcəm” - Video

Rusiya prezidentinin mətbuat katibi Dmitri Peskovun oğlu Nikolay Peskov səfərbərlik üçün hərbi komissarlığın çağırışına getməkdən imtina edib.

PİA.az xəbər verir ki, bu gün jurnalistlər hərbi komissarlıq adından Rusiya prezidentinin mətbuat katibi Dmitri Peskovun oğlu Nikolay Peskova zəng ediblər və ondan sabah saat 10-da səfərbərliklə bağlı hərbi komissarlığa gəlməyi tələb ediblər. Yayılan videoda jurnalist özünü həsrbi komissarlığın əməkdaşı olaraq təqdim edərək Nikolay Peskovdan həkim müayinəsindən keçmək üçün hərbi komissarlığa gəlməsini istəyiblər. Kremlin sözçüsünün oğlu isə cavabında bildirib ki, o sabah 10-da hərbi komissarlığa gəlməyəcək və ümumiyyətlə bu məsələni digər səviyyədə başqa yolla həll edəcək. Oğul Peskov imtinasını onu birbaşa cəbhəyə aparılma ehtimalı ilə əlaqələndirib. Daha sonra jurnalist-“hərbi komissar” ondan soruşub ki, Nikolay Peskov könüllü olaraq orduya qatıla bilərmi? Cavabında isə Nikolay Peskov bildirib ki, o, könüllü olaraq müharibəyə getmək istəmir və buna görə də onun adının qarşısına razılıq işarəsi qoyulmasın.

Nikolay Peskovun səs yazısı yayıldıqdan sonra Rusiya prezidentinin mətbuat katibi Dmitri Peskov bildirib ki, onun oğlu səfərbərlikdən imtina etməyib və səs yazısını yayan jurnalistlər həmin söhbəti qayçılayaraq” Nikolay Peskovun fikirlərinin mahiyyətini dəyişiblər.

Qeyd edək ki, bu gün səhər saatlarında Rusiya prezidenti Vladimir Putin qismən səfərbərliklə bağlı fərman imzalayıb.

pia.az