“Qazaxın 7 kəndinin boşaldılması proseslərin inkişafından xəbər verir”

“Ermənistan 10 noyabrda imzalanan üçtərəfli bəyanatın müddəalarının yerinə yetirilməsi üçün öhdəlik götürüb. Qarşı tərəf mütləq və birmənalı şəkildə bu öhdəlikləri yerinə yetirməli, bəndlərin həyata keçirilməsi ilə bağlı real addımlar atmalıdır. Prosesin yubadılması Ermənistanın ziyanınadır”.

Bu sözləri Demokrat.az-a açıqlamasında Milli Məclisin deputatı Naqif Həmzəyev bildirib.

O, Ermənistan tərəfindən Qazaxın 7 kəndinin boşaldılması proseslərin inkişafından xəbər verdiyini qeyd edib:

“Ermənistanın Dilican vilayətinin qurbernatoru Qazaxın 7 kəndindən sonradan köçürülən əhalinin təxliyəsi ilə bağlı sərəncam imzalaması Ermənistanın nəzərdə tutulan öhdəlikləri yerinə yetirməyə hazırlaşdığını göstərir. Lakin son ana qədər bu prosesə arxayın olmaq olmaz. Qazaxın 7 kəndi tam olaraq Azərbaycan hərbçilərinin nəzarətinə verilməyənədək Ermənistan tərəfinin bu sərəncamlarına inanmaq yanlış addım olar. Düşünürəm ki, üçtərəfli İşçi Qrupu bu məsələ ilə bağlı konkret fəaliyyət proqramı hazırlayıb təsdiqləyəcək. Bu proqrama uyğun olaraq, proses həyata keçiriləcək. Görünür, son danışıqlarda məsələ müzakirə edilib. İstənilən halda, Qazax və Naxçıvanın kəndləri Azərbaycana geri qaytarılacaq. Həmçinin, Zəngəzur dəhlizinin açılması da Ermənistanın istəklərindən asılı olmayaraq həyata keçiriləcək. Düşünürəm ki, yaxın müddətdə bu prosesin reallaşmasının canlı şahidi olacağıq”.